Dili, 23 Juñu 2026. Exelénsia Prezidente Autoridade Munisípiu Aileu “João Bosco dos Santos” hamutuk ho Diretór Servisu Munisipál Agrikultura, Reprezentante Administrador Postu Administrativu Aileu no parte Ministériu Agrikultura Pekuária, Peskas no Florestas ne’ebé reprezenta husi DNEFA “Sr. Januario Marçal”, tersa horseik partisipa iha workshop validasaun ne’ebé organiza husi Organizasaun Ai-han no Agrikultura Nasoins Unidas (FAO), iha City8 Manleuana (Leadership room).
Iha fulan Fevereiru ne’e, Ministériu Agrikultura, Pekuária, Peskas no Floresta (MAPPF) liu husi Diresaun Jeral Agrikultura, Kafe no Plantas Industriais, iha kolaborasaun ho Organizasaun Ai-han no Agrikultura Nasoins Unidas (FAO), halo ona sorumutu nasionál ida hodi halo konsultasaun inisial kona-bá projetu restorasaun rai degradadu sira liuhusi sistema agroalimentar ne’ebé biodiversidade-amigável, ho alvu prinsipal mak Lagóa Seloi, Aileu.
Projetu ne’e buka atu hakbiit komunidade lokál sira atu implementa no habelar sistema agríkola sira ne’ebé amigável ba biodiversidade iha Lagóa Seloi no área sira ne’ebé besik ba Lagóa ne’e, atu hadi’a kondisaun moris no hadi’a biodiversidade.
Enkuantu ekipa ne’ebé serbisu ba formulasaun projetu ne’e nian, hala’o ona konsultasaun mós ho Autoridade no komunidade sira iha Suku Seloi-kraik, hodi rona sira-nia hanoin no konfirma sira nia interese oinsa projetu ida ne’e bele responde diak liutan ba komunidade agrikultór sira-nia prioridades. Konsultasaun hanesan hala’o ona mós ho liñas ministeriais iha nível nasionál hodi aserta aliñamentu ho prioridade nasionál no asegura koordenasaun servisus ne’ebé iha objetivus komplementáriu.
Tan ne’e, haktuir ba kalendarizasaun husi FAO nian, iha loron 23 fulan Juñu ne’e sei hala’o workshop validasaun ida hodi akumula parte Autoridade Munisípiu no Ministériu Agrikultura no entidade relevante seluk, atu partisipa no kontribui ideia brillante sira ba projetu ne’ebé sei implementa iha tinan 2027 ho ninia benefísiu direita ba komunidade Seloi.
Exelénsia PAM-Aileu agradese tebes ba FAO tanba hili ona Lagóa Seloi hodi implementa projetu restorasaun rai degradadu sira liuhusi sistema agroalimentar ne’ebé biodiversidade no amigável, maibé nia parte mak nafatin ezije ba ekipa atu hala’o koordenasaun no komunikasaun ne’ebé efetivu entre instituisaun sira, hodi ajuda atu garante implementasaun projetu lao tuir planu, responde ba nesesidade komunidade sira, no atinje objetivu projetu nian ho efisiente.
Entretantu projetu ida-ne’e sei kontribui signifikativamente ba dezenvolvimentu sustentável iha Seloi, liuhusi restaurasaun rai degradadu sira no promosaun sistema agroalimentar ne’ebé harmoniza produzaun ai-han ho konservasaun ambientál.
Ho apoiu husi governu, parseiru dezenvolvimentu no komunidade lokal, projetu ida-ne’e bele sai modelu ida ba restaurasaun ambientál no seguransa ai-han iha Timor-Leste tomak no espesiál iha Munisípiu Aileu (Lagóa Seloi).
Tuir planeamentu FAO nian katak, projetu ne’e sei hala’o durante tinan 3 (komesa iha fulan Abril 2027 no sei remata iha fulan Agostu 2030).
Workshop ne’e partisipa mós husi grupu komunidade sira husi Seloi.
asesu informasaun detallu iha link :
Aileu–Remexio, 17 Juñu 2026 – Exelénsia PAM-Aileu, 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬, hamutuk ho Komandante PNTL Munisípiu Aileu, 𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐗𝐞𝐟𝐞 𝐀𝐧𝐭ó𝐧𝐢𝐨 𝐝𝐚 𝐋𝐮𝐳, 𝐋𝐢𝐜. 𝐂𝐆, kuarta ohin akompaña husi Diretóra Servisu Munisipál ONG no OC’s, Diretór STAE Aileu, Administrador Postu Administrativu Remexio, Komandante Eskuadra, Xefe Suku Tulataqueo no entidade relevante sira seluk, hala’o diálogu ho komunidade husi aldeia haat ne’ebé sei integra ba Suku foun Aikurus iha Postu Administrativu Remexio, Munisípiu Aileu.
Iha diálogu ne’e, PAM hateten katak proposta kriasaun Suku foun Aikurus importante tebes atu hafasil servisu administrativu, hakbesik governu ba povu no hadi’a asesu komunidade sira ba servisu públiku. Nune’e, nia husu ba komunidade atu kontinua hametin relasaun dame, unidade no hakmatek hodi garante katak prosesu estabelesimentu suku foun ne’e bele lao ho susesu.
Iha oportunidade hanesan, Komandante PNTL Munisípiu Aileu apela ba komunidade tomak atu mantein paz, respeitu malu no kooperasaun durante prosesu estabelesimentu suku foun. Nia reafirma katak PNTL sei kontinua halo monitorizasaun no koordenasaun liuhusi orientasaun ba Komandante Eskuadra no membru OPS sira, hodi garante seguransa, estabilidade no orden públika durante prosesu administrativa to’o suku foun ne’e bele funsiona normal hanesan suku sira seluk, no sei kontinua asegura nafatin ba futuru.
Diálogu ne’e mós sai nu’udar oportunidade ida ba komunidade sira hodi hato’o hanoin, sujestaun no preokupasaun sira kona-ba preparasaun no implementasaun Suku Foun Aikurus. Diskusaun sira lao ho ambiente dame no konstrutivu, no komunidade sira hatudu prontidaun atu simu no apoia estabelesimentu suku foun ne’e.
Enkuantu diálogu ida ne’e reflete kompromisu governu atu garante partisipasaun ativa komunidade nian iha prosesu tomada desizaun, hodi asegura katak Suku foun Aikurus bele responde di’ak liu ba nesesidade no interese povu lokál sira nian.
=========
Entretantu antes ne’e, iha loron 16 Juñu 2026, iha Salão VIP Ministériu Administrasaun Estatal, Díli, hala’o enkontru kona-ba Konfirmasaun no Fiksasaun Naran Aldeia no Suku foun 2026 ba Postu Administrativu Aileu-Vila no Remexio, Munisípiu Aileu.
Bazeia ba diskusaun, opiniaun komunidade nian no konsiderasaun kona-ba lisan no istória tradisionál ne’ebé aprezenta husi PAM-Aileu no Administrador Postu Administrativu sira, parte hotu-hotu ne’ebé marka prezensa konkorda katak:
• Laiha impedimentu ba proposta kriasaun Suku Foun Sarin no Suku Foun Aikurus atu avansa ba prosesu eleisaun suku no ofisialmente sai hanesan suku foun iha Munisípiu Aileu.
• Aprova proposta naran aldeia no estrutura administrativa ba suku foun sira hanesan tuir mai:
a. Suku Sarin – Postu Administrativu Aileu-Vila, forma husi baze Suku Fahiria, integra Aldeia Sarin no aldeia foun rua, mak Aldeia Malani no Aldeia Era Kolo-Bere.
b. Suku Aikurus – Postu Administrativu Remexio, forma husi baze Suku Tulataqueo, integra Aldeia Dacilelo, Aldeia Fatubutik, Aldeia Kolimanuk no Aldeia Laranunu, ne’ebé antes mak Aldeia Aikurus.
=========
Tuir lista provizóriu ne’ebé STAE Aileu halo verifikasaun katak, eleitór hamutuk 600 e tal ona mak sei partisipa iha eleisaun suku Aikurus nian.
Oportunidade ida ne’e hakarak relata hela, prosesu preparasaun ba estabelesimentu suku foun sira iha tinan ne’e atinje ona 95%.
Iha diálogu ne’e partisipa mós husi Xefe Gabinete PAM-Aileu ho nia ekipa, xefe aldeia no komunidade sira.
Autoridade Munisípiu Aileu liuhusi Servisu Munisipál Aprovizionamentu hakarak anúnsiu selesaun empreza iha konkursu públiku munisipál ba Kapitál Dezenvolvimentu nian.
Enkuantu ho anúnsiu ida ne’e, Autoridade Munisípiu Aileu bazeia ba artigo 51° husi Diploma Ministerial No. 19/2013, 16 Outubru mai anúnsiu rezultadu KONKURSU PÚBLIKU KAPITAL DEZENVOLVIMENTU tuir prosesu Aprovizionamentu SMA.
Nune’e, solisita ba públiku “Empreza sira” atu akompaña rezultadu sira iha dokumentu ne’ebé aneksa ona. Obrigadu wain.
Aileu, 18 Juñu 2026.
dokumentus anexo : Selesaun Empreza iha Konkursu Publliku Munisipal ba Konkursu Publiku Kapital Dezenvloviemnto -2026 | Autoridade Munisipal Aileu
Aileu, 18 Juñu 2026. Reprezentante PAM-Aileu liu husi Sekretáriu Munisipál Asuntu PIDI “𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐀𝐮𝐫é𝐥𝐢𝐨 𝐀𝐥𝐞𝐢𝐱𝐨 𝐌𝐚𝐫𝐭𝐢𝐧𝐬”, kinta ohin partisipa no hala’o abertura ba sorumutu ne’ebé hala’o husi Diresaun Nasionál Extensaun Formasaun Agríkola realiza sorumutu avaliasaun progresu servisu programa Extensaun ho Diretór Agrikultura Munisipál sira inklui aprezenta mós rezultadu servisu extensaun iha tinan 2026.
Enkontru ne’ebé realiza iha salaun I AMA ne’e, Diretor Servisu Munisipál Agrikultura Aileu “𝐒𝐫. 𝐏𝐞𝐝𝐫𝐨 𝐝𝐨𝐬 𝐒𝐚𝐧𝐭𝐨𝐬 𝐝𝐚 𝐒𝐢𝐥𝐯𝐚”, hato’o agradese ba diretór Agrikultura Munisipál sira tanba bele hasoru malu iha Munisípiu Aileu, atu nafatin servisu hamutuk iha servisu setór Agrikultura nian hodi bele hasa’e produsaun iha Munisìpiu ida-idak nian. “Obrigado mós ba Diresaun Nasionál Extensaun Formasaun Agrikola tanba hili Munisípiu Aileu sai uma na’in ba enkontru refere”. Dehan Diretór Agrikultura Aileu.
Sorin seluk Diretór DNEFA “𝐒𝐫. 𝐉𝐚𝐧𝐮𝐚𝐫𝐢𝐨 𝐌𝐚𝐫ç𝐚𝐥” kontinua reforsa, enkontru ne’e hodi halo avaliasaun servisu extensaun sira iha Munisipál oinsa mak atu avalia implementasaun programa ne’ebé mak hala’o, tanba enkontru ne’e bazia ba Manual Extensaun Agríkola. Diresaun mós kontinua prepara planu Anual Asaun 2027 nian nune’e bele ajusta programa extensaun sira.
Bazeia ba lei organiku, Diresaun mós estabelese sentru formasaun Agríkola iha Munisípiu 2 hanesan Manatuto “Natarbora” no Maliana Munisípiu Bobonaro. Diresaun Nasionál finansia sentru sira ne’e nune’e, bele lao diak iha futuru atu bele hasa’e produsaun.
Munispiu sira halo rekrumentu ba extensionista iha Munisípiu Diresaun Nasional fo asisténsia nafatin hodi kapasita no formasaun nune’e ba oin sei fó asisténsia ba agrikultór sira iha baze, atu lao diak liutan tanba objetivu prinsipál mak presija hadia setór agrikultura nune’e ba oin atu hasa’e produsaun rai laran liuliu iha nivel Munisipiu sira”.
Iha sesaun abertura sorumutu husi Sekretáriu Munisipál Asuntu PIDI “𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐀𝐮𝐫é𝐥𝐢𝐨 𝐀𝐥𝐞𝐢𝐱𝐨 𝐌𝐚𝐫𝐭𝐢𝐧𝐬”, hatete, progresu servisu iha kampu durante ne’e lao diak, maibé liu husi enkontru atu mellora no hadia servisu extensaun sira iha kampu nune’e ba oin bele lao diak iha futuru. “Aileu nakloke ba Governu ou ajensia se de’it mak atu mai halo servisu iha setór agrikultura, nune’e ba oin bele garante produsaun iha Munisípiu Aileu”.
Iha sorumutu ne’e partisipa husi Diretòr Servisu Agrikultura Munisipál sira hanesan Ainaro, Baucau, Bobonaro, Covalima, Manatuto, Lautem, Likisa, Manufahi, Viqueque, Ermera inklui Dili tanba iha enkontru ne’e iha diskusaun no resposta kona ba rezultadu husi asaun ba atividade hotu ne’ebé konklui ona iha kada Munisípiu.
Dili, 12 Juñu 2026. Reprezentante PAM-Aileu liu husi Sekretáriu Munisipál Asuntu Administrasaun no Finansas “Sr. José Vicente Vilanova”, hamutuk ho Sekretáriu Munisipál Asuntu PIDI “Sr. Francisco Aurélio Aleixo Martins” no akompaña husi Diretores Servisus Munisipais hanesan “Finansas, Ajénsia Planeamentu, Aprovisionamentu, PDIM, PNDS, no ONG no OC’s”, sexta ohin partisipa iha sorumutu jornada orsamentu tinan 2027 nian ne’ebé prejide husi S.E. Primeru Ministru Kay Rala Xanana Gusmão hamutuk ho membru IX Governu Konstitusionál sira, iha Ministeriu Finansas, Dili.,
Jornada Orsamentu 2027 nian ne’e, nu’udar pontupartida ofisiál ba planeamentu no definisaun tetu fiskál ba OJE 2027. Lema ofisiál Jornada Orsamentu 2027 mak “Hametin Reziliensia Liuhosi Transformasaun Diversifika Ekonomia, Asegura Futuru Ida Sustentável”.
Objetivu husi sorumutu ne’e mák permite membru IX Governu Konstitusionál, kuadru tékniku, no autoridade munisipál sira atu analiza hamutuk situasaun makroekonómika no define limitasaun ba despeza sira.
Partisipa iha sorumutu ne’e, Membro Governu, Presidente no membro Deputadus Komisaun C-PN, Ajénsia Autonomia, Munisipiu, Tékniku husi Linha, Ministériu, Diretur Jeral Administrasaun Finansas ho Diretur Nasionál Finansas, RAEOA/ZEEMS, Sosiedade Sivil, Prezidente no responsável Sekretariadu Munisipal, no Xefi gabinete MAE, Diretor-Jeral no Prezidenti Autoridade Munisipál sira.
#Medi@Mae_26
Aileu, 11 Juñu 2026. Exelénsia Prezidente Autoridade Munisípiu Aileu “𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” ho estrutura Autoridade no Komandante PNTL Munisípiu Aileu “𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐗𝐞𝐟𝐞 𝐀𝐧𝐭ó𝐧𝐢𝐨 𝐝𝐚 𝐋𝐮𝐳, 𝐋𝐢𝐜. 𝐂𝐆”, kinta ohin akompaña Embaixadór Portugal iha Timor-Leste “𝐒𝐫. 𝐃𝐮𝐚𝐫𝐭𝐞 𝐁𝐮é 𝐀𝐥𝐯𝐞𝐬”, hamutuk ho Sekretáriu Estadu Negósiu Estranjeiru no Kooperasaun Portugal “𝐒𝐫𝐚. 𝐀𝐧𝐚 𝐈𝐬𝐚𝐛𝐞𝐥 𝐌𝐚𝐫𝐪𝐮𝐞𝐬 𝐗𝐚𝐯𝐢𝐞𝐫” no Prezidente Konsellu Diretivu Camões, IP “𝐒𝐫𝐚. 𝐅𝐥𝐨𝐫𝐛𝐞𝐥𝐚 𝐏𝐚𝐫𝐚í𝐛𝐚”, hala’o vizita ofisiál ba eskola Centro de Aprendizagem Formação Escolar – CAFE Aileu, hodi observa direita prosesu dezenvolvimentu no kapasitasaun estudante sira nian iha Munisípiu Aileu.
Iha vizita ne’e, estudante sira simu entidade sira ho animasaun no aprezenta buat oioin ne’ebé hatudu sira-nia koñesimentu no kreatividade. Estudante sira halo aprezentasaun dansa hodi haburas atmosfera vizita no hatudu talentu sira iha área arte no kultura.
Aleinde ne’e, estudante sira mós aprezenta rezultadu husi transformasaun material plástiku reutilizável ba sasaan kreatividade no útil, hanesan parte husi edukasaun ambientál no promosaun resiklajen. Atividade ne’e hatudu estudante sira-nia kapasidade atu uza material descartável “materiál ne’ebé ita uza dala ida deit soe tia” hodi kria produtu ne’ebé iha valór.
Sorin seluk iha área siénsia, estudante sira aprezenta materia kimika liuhusi demonstrasaun prátika ne’ebé prepara no hala’o diretamente husi sira rasik ho orientasaun husi profesór sira. Aprezentasaun ne’e hatudu estudante sira-nia kompreensaun ba teoria no prátika siénsia, nomós kapasidade atu aplika koñesimentu ne’ebé aprende iha sala aula.
Vizita ne’e sai hanesan oportunidade importante atu hatudu progresu edukasionál estudante sira no fortalese relasaun entre instituisaun edukasaun, Governu Munisipál Aileu no parseiru dezenvolvimentu sira.
Entretantu momentu kmanek ne’e, Exelénsia Prezidente Autoridade Munisípiu Aileu no Komandante PNTL Munisípiu Aileu hamutuk ho Diretór/a Servisu Munisipál sira, lori mós Delegasaun Portugal sira ba observa direita monumentu masakrados portugueses 1942 nian. Vizita ne’e hala’o hodi rekuiñese valor istóriku monumentu ne’e hanesan símbolu ida husi memória no omenajen ba vítima sira ne’ebé mate durante akontesimentu istóriku iha tinan 1942.
Iha oportunidade ne’e, PAM hato’o informasaun ba Embaixadór Portugal kona-ba esforsu Governu Munisipál nian atu preserva patrimóniu istóriku ne’e., “Iha Planu Asaun Anuál (PAA) Munisípiu Aileu ba tinan 2027, Autoridade preve ona osan natoon hodi hala’o reabilitasaun ba Monumentu Masakrados Portugueses 1942 nian. Tanba reabilitasaun ne’e importante atu asegura monumentu kontinua preservadu di’ak no bele sai fatin edukasaun istórika ba jerasaun foun sira, nomós fatin refleksaun ba komunidade no vizitante sira”.
Delegasaun Portugal apresia inisiativa Governu Munisipál Aileu nian no subliña importánsia preservasaun patrimóniu istóriku hanesan meiu ida atu mantein memória kolektiva no hametin relasaun amizade entre Timor-Leste no Portugal.
Durante vizita ofisiál ne’e, akompaña mós husi Reprezentante Administrador Postu Administrativu Aileu-Villa, Diretores Servisus Munisipais no Professores husi Eskola COSPEPAL.
Aileu, 11 Juñu 2026. Exelénsia Prezidente Autoridade Munisípiu Aileu “𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” ho estrutura Autoridade, kinta ohin akompaña Embaixadór Portugal iha Timor-Leste “𝐒𝐫. 𝐃𝐮𝐚𝐫𝐭𝐞 𝐁𝐮é 𝐀𝐥𝐯𝐞𝐬”, hamutuk ho Sekretáriu Estadu Negósiu Estranjeiru no Kooperasaun Portugal “𝐒𝐫𝐚. 𝐀𝐧𝐚 𝐈𝐬𝐚𝐛𝐞𝐥 𝐌𝐚𝐫𝐪𝐮𝐞𝐬 𝐗𝐚𝐯𝐢𝐞𝐫” no Prezidente Konsellu Diretivu Camões, IP “𝐒𝐫𝐚. 𝐅𝐥𝐨𝐫𝐛𝐞𝐥𝐚 𝐏𝐚𝐫𝐚í𝐛𝐚”, hodi hala’o vizita ba Sentru Agroflorestal Quinta Portugal, ne’ebé lokaliza iha Aldeia Hularema, Suku Seloi-Malere no Postu Administrativu Aileu-Villa.
Hafoin kolleta kafé iha Sentru Agrofloresta Quinta Portugal ne’e, Koordenadór husi Projetu Quinta Portugal “𝐒𝐫. 𝐇𝐮𝐠𝐨 𝐌𝐢𝐠𝐮𝐞𝐥” ho ekipa tékniku sira fó demonstrasaun kona-ba prosesu transformasaun kafe, hahú husi prosesu selesaun, hamaran, tosta no moos kafe to’o prontu ba konsumu.
Durante atividade ne’e, entidade sira hetan oportunidade atu observa diretamente etapa importante sira iha transformasaun kafé no prova rezultadu husi kafé ne’ebé prosesa ona. Demonstrasaun ida ne’e hatudu valór akresidu husi produtu kafé lokál no importánsia husi prosesamentu di’ak atu hasa’e kualidade no valor merkadu kafé iha nível Lokál, Nasionál no Internasionál mós.
Husi vizita ne’e, hetan apresiasaun mós husi bainaka importante sira, tanba esforsu no inovasaun husi ekipa Sentru Agrofloresta Quinta Portugal ne’ebé maka kontinua promove dezenvolvimentu setór kafé no fó kontribuisaun ba melloria ekonomia komunidade no agrikultór sira iha Munisípiu Aileu no imajen Aileu nian ba mundu.
Aileu, 10 Juñu 2026. Prezidente Konsellu Koordenasaun Munisipál atuál Exelénsia PAM-Aileu “𝗝𝗼ã𝗼 𝗕𝗼𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀” akompaña mós ho Vise nain-3, kuarta ohin realiza sorumutu KKM ba faze daneen hamutuk ho Diretores Servisus Munisipais, Delegasaun Territoriais, Pontu Fokál, Administrador Postu no Reprezentante Autoridade Komunitária husi Postu sira.
Enkuantu sorumutu ba loron ohin nian iha salaun I AMA ne’e, foká ba aprezentasaun sira hanesan;
01. Planu Asaun Anuál-PAA 2027 ne’ebé previstu bazeia ba sorumutu Konsellu Koordenasaun Territoriál- KKT, ne’ebé aprezenta husi Diretór Ajénsia Munisipál Planeamentu;
02. Preparasaun ba Partisipa iha Feira Nasionál hodi Komemo Loron Proklamasaun Independénsia Unilaterál RDTL ba Dala-51 “28 Novembru 1975 – 2026”. Iha ajenda ida ne’e Prezidente KKM fó sai mós atividade ho várius kompetisaun ne’ebé mak Ministériu deside ba Munisípiu sira atu hala’o preparasaun antes ba kompete “aprezenta” iha nasionál.
Ámbitu diskusaun sira, Prezidente orienta emediata Servisu Munisipál responsável, Administrador Postu no Lideransa Komunitária sira atu kria koordenasaun hodi tau importánsia atu promove valor kultura, produtu agríkola no potensial lokál Munisípiu Aileu nian atu bele konkore no reprezenta Munisípiu ho dignidade iha nível nasionál.
03. Ajusta lista no Orsamentu ba Funsionáriu Temporáriu sira, aprezenta husi Diretór Servisu Munisipál Rekursus Humanus; sesaun ida ne’e, Prezidente orienta Servisu Munisipál Rekursus Humanus atu halo verifikasaun no atualizasaun dadus ho rigor no transparénsia, atu garante prosesu administrativu no finanseiru hala’o tuir regulamentu no prosedimentu vigora.
04. Prosesu Atendimentu Kombustivel ba Autoridade Aileu, aprezenta husi Diretór Servisu Munisipál Patrimóniu no Lojístika; no
05. Relatóriu Ezekusaun Orsamentu Q1, aprezenta husi Diretór Servisu Munisipál Finansas.
Iha sesaun aprezentasaun sira, Membru Konsellu Koordenasaun Munisipál (KKM) sira hato’o preokupasaun, observasaun no sujestaun sira reflete ba ajenda prinsipál sira. Entretantu iha preukupasaun sira hetan intervensaun husi Prezidente KKM nian ne’ebé fo satisfasaun ba fórum. Líder Máximu ne’e mós agradese ba kontribuisaun no partisipasaun ativu husi Membru KKM sira hotu, no husu atu kontinua hametin espiritu servisu hamutuk, koordenasaun no kompromisu hodi promove dezenvolvimentu Munisípiu Aileu.
Sorumutu ne’e prezensa mós husi II Komandante PNTL Munisípiu Aileu “𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐀𝐬𝐬𝐢𝐬𝐭𝐞𝐧𝐭𝐞 𝐉𝐨𝐚𝐪𝐮𝐢𝐦 𝐌𝐚𝐫𝐪𝐮𝐞𝐬, 𝐋𝐢𝐜. 𝐃𝐢𝐫, 𝐌𝐇” ho ekipa, Funsionáriu Autoridade no Estudante Estajiadu sira husi UNTL.
© 2026 Autoridade municípal de Aileu
