Aileu, 01 Dezembru 2025. Sekretáriu ba Asuntu Administrasaun no Finansas “𝐒𝐫. 𝐉𝐨𝐬é 𝐕𝐢𝐜𝐞𝐧𝐭𝐞 𝐕𝐢𝐥𝐚𝐧𝐨𝐯𝐚”, segunda ohin akompaña husi Diretór Sentru Dadus TIC TIMOR, I.P. “𝐒𝐫. 𝐑𝐮𝐬𝐦𝐢𝐧 𝐕𝐢𝐜𝐞𝐧𝐭𝐞 𝐝𝐞 𝐅á𝐭𝐢𝐦𝐚 𝐒𝐨𝐚𝐫𝐞𝐬”, hala’o ona abertura ba formasaun profesionál iha área dijitalizasaun no governu eletrónika nian ba Diretores, Administradores, Funsionáriu Apoiu Tékniku iha Públiku no Ajente Administrasaun Públika sira, durante loron 10, hahú husi 01-10 Dezembru 2025, iha salaun II Autoridade Munisipál Aileu.

Objetivu husi formasaun ne’e maka, TIC TIMOR, I.P hakarak harii fundasaun teknolójiku ne’ebé metin ba lideransa no funsionáriu públiku tomak, hodi halo transformasaun ba teknolójia dijital iha Munisípiu Aileu.

Entertantu durante loron 10 ne’e formandu sira sei aproveita matéria importante sira konsentradu iha prátika, hanesan: Introdusaun Teknolójia Informasaun no Komunikasaun – TIK, Microsoft Word, Microsoft PowerPoint, Microsoft Excel, Cyber Security, Government Email, Transformasaun Teknolójia Dijital no Artifisial Intelejensia.

Formasaun ne’e akompaña mós husi Estudante Estajiadu UNPAZ husi Fakuldade Ciência Sosiais e Humanas no Departamentu Administrasaun Públika.

#remata.

#mediagatpama2025.