Aileu, 20 Outubru 2025.

Iha sesaun abertura husi PAM-Aileu “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” enkoraza alin estudante sira atu esforsu a’an estuda maka’as no hatudu mós hahalok diak, pasu investimentu ida ba futuru “era ida agora ne’e ita iha ona dizitalizasaun, presija imi-nia pensamentu no hanoin diak sira hodi kontribui ba rai ida ne’e. Ita konsiente povu Aileu ne’e maioria moris ho agrikultura, atu dignifika inan/aman sira nia sakrifísiu maka presija imi-nia haraik a’an no esforsu maka’as. Futuru imi-nian sei do’ok, kontinua aprende tanba tinan 5 ou 10 mai ita la hatene saida mak akontese, nune’e prepara aan ba rai ida ne’e presija ema matenek ho kualidade diak”.

Lider máximu iha Munisípiu ne’e subliña, ezijénsia prepara aan ida ne’e tanba, agora dadaun ita iha hela prosesu ida avaliasaun kondisaun mínimu ba implementasaun desentralizasaun no podér lokál, iha loron 26 fulan Outubru mós Timor-Leste sai membru permanente ba ASEAN. Buat hirak ne’e hotu, ita presija rekursus humanus katak, ema ho kualidade diak. Tan ne’e esforsu aan no kontinuasaun eskola hodi finaliza estudu iha banku universitáriu, rai ne’e presija imi.

=========

Total estudante husi banku EBC, Ensinu Rekorente, ESG no ESTV ne’ebé lokaliza iha Postu Administrativu 4 iha Munisípiu Aileu ba loron ohin hala’o Exame Nasionál ne’e mak hanesan:

01. Ensinu Báziku 3⁰ Ciclo – EBC ba klase 9⁰ ano: totál estudante 1027 “Rihun-ida rua-nulu resin-hitu”;

02. Ensinu Rekorente ba faze da-5 “9⁰ ano”: totál estudante 72 “Hitu-nulu resin-rua”;

03. Ensinu Sekundária Gerál – ESG ba klase 12⁰ ano: totál estudante 1101 “Rihun-ida atus-ida, ida”; no

04. Eskola Sekundária Tékniku Vokasionál – ESTV ba klase 12⁰ ano: totál estudante 33 “Tolu-nulu resin-tolu”.

Entertantu totál estudante ESG Aileu Malere “ESGAM” ne’ebé ofisialmente PAM hala’o abertura exame nasionál reprezenta nível Munisípiu ba loron ohin nian hamutuk, estudante 327 “Atus-tolu rua-nulu resin-hitu”.

Seremónia ne’e akompaña direita husi Diretóra Servisu Munisipál Edukasaun, II Komandante PNTL Aileu, Diretor ESGAM ho Professór/a sira.

#remata.