Aileu, 17 Dezembru 2025. Komisaun Koordenadora ba Atividade Avaliasaun Kondisaun Mínima ne’ebé lidera husi Koordenadór Ekipa “𝐃𝐆 𝐈𝐍𝐀𝐏, 𝐒𝐫. 𝐏𝐨𝐥𝐢𝐜𝐚𝐫𝐩𝐨 𝐀𝐦𝐢𝐥𝐜𝐚𝐫 𝐁𝐨𝐚𝐯𝐢𝐝𝐚” ho ninia estrutura, kuarta horseik kontinua hala’o avaliasaun ba Autoridade Aileu ninia preparasaun sira, relasiona ho futuru implementa desentralizasaun no podér lokál no atualizasaun baze de dadus: Eleitoral, Sistema Integradu Informasaun no Jestaun dadus Suku no Aldeia – SIIGSA, Balkaun Úniku, Portál Munisipál no Profile Munisipál.
Avaliasaun ne’ebé hala’o ne’e haktuir ba despaxu husi Ministru ba Ministériu Administrasaun Estatal “𝐒. 𝐄. 𝐓𝐨𝐦á𝐬 𝐝𝐨 𝐑𝐨𝐬á𝐫𝐢𝐨 𝐂𝐚𝐛𝐫𝐚𝐥” nian ho Nú. Referénsia 48/M-MAE/XII/2025, kona-ba kriasaun komisaun koordenadora atividade avaliasaun kondisaun mínima mai iha Munisípiu liu husi intervista ba Autoridade Aileu ne’ebé direita ba Servisu Munisipál no Delegasaun Territoriál sira-nia servisu hotu ne’ebé durante ne’e hala’o ona.
Ohin ita hala’o avaliasaun hasoru malu ba dala rua nian ne’ebé hahú ohin loron 17 – 19 fulan ne’e. Hanesan iha avaliasaun primeiru hau koalia ona, atu hakat ba Kâmara Munisipál ne’e presija dirijente sira hotu nia esforsu no servisu hamutuk, tanba Autoridade mesak deit labele atu halo buat ida, presija servisu ekipa dunik. Ho ida ne’e mak ita bele atinje. Dehan PAM.
“Husu ba Dirijente sira durante avaliasaun ne’e tenki mantein nafatin iha ida-idak nia fatin hodi fornese dadus sira bajeia ba buat ne’ebé komisaun avaliasaun sira husu”. PAM orienta.
Hafoin abertura atividade husi PAM-Aileu “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬”, kontinua kedas ho aprezentasaun sira husi Portál Munisipál, STAE Aileu ho IT Postu sira, atu asegura reajustamentu no atualizasaun dadus populasaun no eleitoral, inklui informasaun kona-ba situasaun suku sira, hodi integra iha Sistema Digital Munisipál (Balkaun Úniku).
Entertantu Governu Konstitusional IX, liu husi Ministériu Administrasaun Estatal (MAE), kontinua implementa atividade espesifiku hodi atinji objetivu sira kona-ba Desentralizasaun Administrativa no Podér Lokál, bazeia ba Dekretu-Lei n. 49/2023, de 23 de agostu, Sesta alterasaun ba DL n. 3/2016, republikadu iha Dekretu Lei 34/2025, de 15 de outubru no tuir Rezolusaun Governu n. 6/2025, ne’ebé refere ba ezekusaun Estratégia Desentralizasaun Administrativa no Instalasaun Órgaun Representativu Podér Lokál 2025-2028.
Rezolusaun ida-ne’e reforsa kompromisu Governu atu aselera transformasaun digital no desentralizasaun administrativa, liu husi estabelesimentu sistema integradu dadus entre nivel nasionál, munisipál to’o suku
Ministerio Administrasaun Estatal fiar katak dadus populasaun ne’ebé atualizadu no fiável mak faktór esensial ba planeamentu, investimentu no determina reprezentasaun iha nível lokál. Ho nune’e, atualizasaun dadus iha Munisípiu nu’udar indikador xave ba relatóriu avaliasaun kondisaun mínimu.
Ekipa avaliadores husi Nasionál ne’ebé destaka iha Aileu ne’e kompostu husi, Koordenadór “DG INAP”, Membru ida husi DGDGL, Membru ida husi DGMAIL, Membru ida husi STAE, Membru ida husi UIT no Xefe Departamentu DNAAS.
Depois konfirmasaun dadus sira durante loron 3 ne’e, ekipa nasionál sira sei vizita direita Servisu Munisipál no Administrasaun Postu Administrativu sira hodi observa atividade ne’ebé durante ne’e hala’o iha Munisípiu Aileu.
Partisipa máximu iha atividade ne’e husi Dirijente Servisu Munisipál, Delegasaun Territoriál, Administradores Postu no Funsionáriu Apoiu Tékniku hotu.
