Aileu, 02 Outubro 2025. Reprezentante DG-Dezenvolvimentu Lokál liuhosi DNADM “𝐒𝐫. 𝐉𝐚𝐧𝐮á𝐫𝐢𝐨 𝐌𝐚𝐠𝐚𝐥𝐡ã𝐞𝐬” hamutuk ho Sekretária ba Asuntu PIDI “𝐒𝐫𝐚. 𝐕𝐢𝐜𝐭ó𝐫𝐢𝐚 𝐌𝐞𝐬𝐪𝐮𝐢𝐭𝐚 𝐝𝐨 𝐑ê𝐠𝐨”, kinta ohin, akompaña PAM “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬”, hodi hala’o abertura ba sorumutu konsultasaun públiku ba ezbosu Planu Dezenvolvimentu Munisipál-PDM hamutuk ho Dirijentes no maluk Aileu-oan hotu “Intelektuál Aileu-oan sira”, iha salaun Timor-klaran Postu Aileu-Villa.
Agradese ba entidade hotu nia partisipasaun, durante ne’e ita nunka tuur hamutuk “Intelektuál Aileu-oan balu iha nasionál” hodi diskute planu Munisípiu nian. Ohin ita presija imi-nia ideia diak oinsá mak bele dezenvolve iha parte hotu-hotu husi pilar importante ne’ebé define ona. Dehan PAM.
“Governu bele troka governu, maibé ideia ne’ebé ita tau hamutuk ona, governu foun ida maka mai mós nia sei labele muda, tanba ida ne’e ezijénsia husi kraik ou baze mak mai”.
Nune’e, hau husu Ita-boot sira-nia pro-ativu hodi haree hamutuk ezbosu ba PDM nian, ida ne’ebé mak diak ona ita mantein no ida ne’ebé mak seidauk diak presija ita tau hanoin hamutuk hodi bele mellora diak liu tan. Dehan Exelénsia João Bosco âmbitu hala’o abertura ba sorumutu konsultasaun públiku ba ezbosu PDM tinan 2026-2030 iha salaun Timor-klaran.
Konsultasaun ba ezbosu PDM ne’e atu define metas, prioridade no asaun ne’ebé implementa hodi promove dezenvolvimentu sosio-ekonómiku no sustentável iha área jurídika Autoridade Munisipál nian. Dokumentu nemós kontempla estratéjia no asaun nesesáriu, nu’udar propózitu ida ne’ebé Servisu Munisipál sira bele alkansa iha tinan lima (5) oin mai, hahú husi 2026-2030.
Âmbitu sorumutu dahuluk ba diskute ezbosu PDM ne’e, partisipante sira hala’o diskusaun liuhosi meza redonda hodi kontribui ideia konstrutivu sira ba pilar importante sira hanesan;
𝟎𝟏. 𝐏𝐢𝐥𝐚𝐫 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐊𝐚𝐩𝐢𝐭á𝐥 𝐒𝐨𝐬𝐢á𝐥:
》Edukasaun, Formasaun/Treinamentu;
》Dezenvolvimentu Juventude no Desportu;
》Dezenvolvimentu Saúde;
》Inkluzaun Sosiál no Igualdade Jéneru;
》Meiu Ambiente; no
》Kultura no Eransa/Patrimóniu.
𝟎𝟐. 𝐏𝐢𝐥𝐚𝐫 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐛𝐚 𝐈𝐧𝐟𝐫𝐚𝐞𝐬𝐭𝐫𝐮𝐭𝐮𝐫𝐚 𝐁á𝐳𝐢𝐤𝐚:
》Estradas, Pontes no Kontrolu Seias;
》Bee-moos no Saneamentu;
》Eletrisidade;
》Transporte Terrestre; no
》Telekomunikasaun.
𝟎𝟑. 𝐏𝐢𝐥á𝐫 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐛𝐚 𝐄𝐤𝐨𝐧ó𝐦𝐢𝐚:
》Dezenvolvimentu Rurál;
》Dezenvolvimentu Agrikultura, Peska, Pekuária no Floresta;
》Turízmu;
》Komérsiu no Indústria;
》Investimentu Setór Privadu; no
》Setór Kooperativa.
=========
Entertantu Autoridade mós sei kontinua realiza konsulta públiku ba faze daruak nian ho entidade hotu iha Aileu hodi diskute klean liu tan ba ezbosu PDM ne’e, molok enkamiña ba Ministériu Administrasaun Estatal, kontinua ba hetan aprovasaun final iha Konsellu Ministru. Hafoin aprovasaun, Autoridade Munisipál sei prodúz sai ba manuál hodi destribui ba Postu, Suku no entidade hotu atu bele akompaña lalaok dezenvolvimentu iha Aileu.
Sorumutu ne’e partisipa husi Diretores Servisus Munisipais, Delegasaun Territoriais, Administrador Postu sira, Autoridade Komunitária, Veteranus, Prezidente CCITL Aileu no Intelektuál Aileu-oan sira iha Nasionál no Munisípiu.
