Aileu, 01 Outubro 2025. Diretor Nasionál ba Apoiu Administrasaun Suku-DNAAS “𝗦𝗿. 𝗖𝗲𝗹𝗲𝘀𝘁𝗶𝗻𝗼 𝗠𝗮𝗿𝗾𝘂𝗲𝘀” hamutuk ho Diretor Servisu Munisipál ONG no Diretor Servisu Munisipál Rekursu Humanu, kuarta ohin, akompaña reprezentante PAM liuhosi Sekretáriu Munisipál ba Asuntu Administrasaun no Finansas “𝐒𝐫. 𝐉𝐨𝐬é 𝐕𝐢𝐜𝐞𝐧𝐭𝐞 𝐕𝐢𝐥𝐚𝐧𝐨𝐯𝐚”, hodi hala’o abertura ba formasaun espesífiku kona-ba livru administrasaun suku 18 nomós programa SIIGSA, direita ba Ofisiál Apoiu Administrasaun Suku sira husi Postu Administrativu Laulara no Postu Administrativu Remexiu.
Importánsia husi livru 18 mak hanesan atu uniformiza administrasaun suku iha territóriu, atu fasilita lideransa komunitária sira nia atendementu ba populasaun iha nivél suku no atu rejistu informasaun sira iha suku laran.
Tuir lei-númeru 9/2016, 8 Juñu artigu 23 ko’alia kona-ba kompeténsia xefe suku iha aliña kona-ba elaborasaun no ezekusaun planu dezenvolvimentu komunitária, signifika atu halo planu anuál ne’ebé di’ak normal ne’e presiza dadus ne’ebé kredível no atuál. Ho nune’e Ministériu Administrasaun Estatal liuhosi Diresaun Nasionál Apoiu Administrasaun Suku estabelese livru administrasaun iha suku sira.
Livru Administrasaun Suku fahe ba grupu tolu mak hanesan, livru administrasaun suku hahú A1 to’o A11, Livru administrasaun populasaun BI to’o B5 no livru administrasaun dezenvolvimentu C1-C2.
#. Funsaun husi Livru Administrasaun Suku A1 to’o A11 mak hanesan: livru A1 kona-ba livru desizaun konsellu suku, A2 livru desizaun suku, A3 livru infertáriu suku, A4 livru ajenda karta sai, A5 livru ajenda karta tama, A6 livru espedisaun, A7 livru lideransa komunitária, A8 lista prezensa, A9 livru minutas enkontru, A10 livru rejistu keixa suku no A11 livru neʼebé atu rejista bainaka.
#. Aleinde ne’e funsaun livru administrasaun populasaun BI to’o B5 mak hanesan: livru B1 livru neʼebé mak atu rejistu populasaun, B2 livru rejistu populasaun temporáriu, B3 livru rejistu mudansa populasaun, livru B4 livru dadus rekapitulasaun populasaun no livru B5 livru rejistu uma-kain; no ikus
#. Livru Administrasaun Dezenvolvimentu Suku kompostu husi livru C1 no C2. Livru C1 ne’e livru ne’ebé atu halo rejistu projetu sira no livru C2 ne’e atu halo rejistu ba atividade sira iha suku sira.
Hafoin ofisiál sira iha ona koñesimentu ba prienximentu livru ne’e, sira sei dijitaliza fali dadus manuál sira ba iha Sistema Integradu Informasaun Jestaun Dadus Suku no Aldeia (SIIGSA).
Entertantu formasaun refere sei hala’o durante loron 2, hahú husi loron kuarta too kinta-feira iha salaun II AMA.
