Aileu, 08 Novembru 2025. Diretór Gerál Juventude-MJDAK hamutuk ho Segundu Komandante PNTL Aileu, Sekretáriu/a Munisipál, Jerente SJMA, Padre Vigáriu ba Parókia SPEPAL ho Sasin Masakre Santa Krúz, sábadu horseik akompaña PAM-Aileu “Exelénsia João Bosco dos Santos” hodi hala’o abertura ba feira no konsertu múzika hodi Komemora Loron Nasionál Juventude ba Dala-XX no Loron Masakre Santa Krúz ba Dala-XXXIV, ne’ebé Nasionalmente selebra iha Munisípiu Aileu.

Sesaun abertura husi PAM hateten, tinan-tinan ita laos atu selebra deit loron juventude, maibé atu halo reflesaun ba saida mak ita atu kontribui ba Nasaun hanesan Juventude. Nune’e lider máximu iha Munisípiu ne’e apela ba juventude sira tenki iha kreativu no hanoin inovativu hodi hamosu buat foun ruma iha Aileu, liu husi kria estabilidade no situasaun hakmatek iha rai-laran, liga ba tema sira:

Tema Nasionál: “𝐇𝐚’𝐮 𝐓𝐢𝐦𝐨𝐫 𝐎𝐚𝐧, 𝐎𝐫𝐠𝐮𝐥𝐥𝐮 𝐛𝐚 𝐇𝐚’𝐮 𝐍𝐢𝐚 𝐍𝐚𝐬𝐚𝐮𝐧” no

Subtema: “𝐇𝐮𝐬𝐢 𝐒𝐚𝐧𝐭𝐚 𝐂𝐫𝐮𝐳 𝐛𝐚 𝐀𝐢𝐥𝐞𝐮 – 𝐇𝐮𝐬𝐢 𝐌𝐞𝐦ó𝐫𝐢𝐚 𝐛𝐚 𝐄𝐬𝐩𝐞𝐫𝐚𝐧𝐬𝐚”.

Entertantu Komemorasaun Loron Nasionál Juventude iha Aileu reflete espíritu unidade entre jerasaun rezisténsia no jerasaun foun. Husi memória Santa Krúz ba esperansa Aileu, juventude Timor-oan afirma orgullu ba rai, kultura, no futuru nasaun.

=======

Nb: Feria no konsertu sira sei hala’o durante loron 5, hahú husi loron 8 – 12, iha Aisirimou, Aileu-Villa, Aileu.

Okaziaun ne’e apela nafatin ba povu Aileu no Povu Timor-Leste atu partisipa iha ita-nia feira ba komemorasaun loron importante ida ne’e, hakbesik mai ba, tanba ita-nia komunidade sira sei atende produtu lokál ho marka diferensa ne’ebé preparadu hela iha kada tenda kiik ka stan sira. Obrigadu basuk!

#remata.

Seremónia abertura ne’e partisipa mós husi Autoridade Komunitária, Professores, Estudante no Povu doben Aileu.

Foto foti husi: ToSsal, DO Bergoglio no Tomichan

#mediagatpama2025.