Aileu, 19/Agostu/2025. Seremónia Agradesimentu ba Komemorasaun 50 Aniversáriu (1975-2025) Loron Insurreisaun Jerál Armada no Fundasaun FALINTIL- F-FDTL, ne’ebé hatuur ho ninia tema: “Habelar Paz Ba Mundu” no Subtema: “FALINTlL no Indentidade Nasionál: Hari’i Karakter Nasaun Ida Nian”.
Âmbitu seremónia, iha reflesaun nasionál kona-ba istória FALINTIL ne’ebé partilla husi sasin moris atuál Xefe Estadu Maior Jenerál F-FDTL, Tenente Jenerál Domingos Raul “Falur Rate Laek”, no Tenente Jenerál Reformadu Lere Anan Timor.
Tenente Jenerál Falur Rate Laek hateten, Munisípiu Aileu iha istória espesífiku tanba funu libertasaun hahu no remata husi Aileu. Nia fo agradesimentu no sentidu kondolénsia ba FALINTIL Aileu oan sira, espesiálmente Aileu oan sira ne’ebé fó sira nia vida hodi liberta Timor-Leste.
“Ha’u mai ho saudasaun espesial ba povu Aileu, hodi haruka no hanoin ba mártires no heróis Aileu oan sira, ne’ebé monu iha kampu de batalla,” hateten Falur. Nia kontinua, “Aileu iha papel importante, tanba FALINTIL hahú no remata funu iha ne’e. Ami fo parabéns ba ita hotu tanba sakrifísiu no kontribuisaun ba libertasaun nasaun.”
Tenente Jenerál Falur salienta reflesaun ne’e hanesan momentu importante atu hamoris luta koletiva no hakruuk ba herói sira hotu ne’ebé fó-an ba independénsia.
Nia apela mós ba instituisaun deféza no seguransa atu kontinua ho espíritu kamaradajen no profesionalizmu, hodi ema labele politiza instituisaun nian, no tenke hakmatek hodi kontinua valor no prinsipiu FALINTIL nian.
Reflesaun hanesan hato’o husi Tenente Jenerál Reformadu Lere Anan Timor “Ami ne’ebé sei moris, ami konta istória sira ne’ebé mate. Ami halo istória no fo valor ba sira nia sakrifísiu. Tanba FALINTIL hahú iha Aisirimou iha tinan 1975, no depois tinan 24, tama transisaun ba Forsa Defeza Timor-Leste. Nia hetan matadalan husi komandante Nicolau Lobato to’o Conis Santana. “Ami ne’ebé sei moris, ami hakotu no sama sira nia mate. Ohin ami hasa’e bandeira independénsia nasionál ba povu maubere,” hateten nia.
Nia subliña mós katak, istória FALINTIL la’os fásil, Ita konta istória ne’e hodi fó hanoin, sobre sofrimentu no sakrifísiu hodi sai reflesaun ba jerasaun foin-sa’e sira hodi hatene istória, para bele kontribui ba paz iha rai laran.
Selebrasaun Loron FALINTIL dala 50 hanesan momentu foun atu loke kápitulu foun ba istória Timor-Leste. FALINTIL seidauk remata nia trajetória. Nia hela iha espíritu povu, no kontribui ba paz, estabilidade no dezenvolvimentu.
Seremónia agradesimentu ne’e partisipa husi Prezidente Tribunal Rekursu, Rep. Parlamentu Nasionál, Ministru CCLN, Komisáriu Jerál PNTL ho Komando PNTL Aileu, Sekretáriu/a Estadu sira, Administrador Postu, Veteranus, Partidu Polítiku, Autoridade Komunitária, Professores, Estudante, Funsionáriu no Povu doben Aileu.
