Aileu, 04 Agostu 2026 – Prezidente Autoridade Munisípiu Aileu, Sr. Jacinto Ribeiro Dias, tersa ohin akompaña Sekretáriu Estadu Formasaun Profesionál no Empregu (SEFOPE) Interinu, Sr. Nelson Soares Carvalho, ne’ebé atualmente ezerse hela kargu hanesan Diretór Jerál Servisu Korporativu, hodi partisipa no ofisialmente loke atividade Feira Kareira no Edukasaun 2026 ne’ebé organiza husi SEFOPE liuhusi Diresaun Nasionál Empregu, durante loron rua (04 – 05 Agostu) iha Salaun Timor-Klaran, Aileu.
Haktuir ba polítika SEFOPE ne’ebé inklui iha Programa Governu IX, Feira Kareira no Edukasaun sai hanesan atividade regular ne’ebé sei realiza iha munisípiu hotu iha Timor-Leste. Objetivu prinsipál husi feira ida ne’e maka atu fó orientasaun ba estudante finalista no foinsa’e sira kona-ba oportunidade kareira, rede profisionál, formasaun vokasionál, edukasaun no bolsu estudu, tantu iha rai-laran hanesan mós rai-liur.
Iha intervensaun, PAM hato’o agradese ba Sua Exelénsia Sekretáriu Estadu Formasaun Profesionál no Empregu tanba hili Aileu hanesan fatin hahú ba implementasaun Feira Kareira no Edukasaun tinan 2026.
“Ho programa ne’ebé prioridade ba foinsa’e sira, hau hato’o agradese ba S.E. Sekretáriu Estadu Formasaun Profesionál no Empregu-SEFOPE tanba inisia Feira Kareira no Edukasaun ba tinan 2026 iha Aileu. Loos dunik hakerek ona istória, tenki hahú dunik husi Aileu atu susesu ne’e ba Timor-Leste”. PAM expresa sentidu agradesimentu.
PAM esplika katak aspetu prinsipál husi feira ida ne’e maka atu ajuda estudante sira prepara an ho abilidade no koñesimentu ne’ebé di’ak liu husi sentru formasaun no universidade sira, atu bele asesu ba oportunidade servisu iha rai-laran nomós rai-liur (internu no externu).
Atu fortifika liu tan objetivu ne’e, PAM konsidera semináriu durante loron rua ne’e bele haburas pensamentu foinsa’e sira no inspira sira atu prepara di’ak ba futuru.
“Atividade durante loron 2 ne’e sei kesi imi-nia futuru. Hanesan Autoridade, hanesan imi-nia Aman no hanesan mós Maun ida, hau enkoraza imi atu aproveita didiak oportunidade sira no labele lakon no soe tempu ba tempu sira ne’ebé mak la produtivu.” Líder máximu iha Munisípiu ne’e inspira.
Durante atividade ne’e, estudante sira sei partisipa iha semináriu (Talk Show) ho oradór sira husi SEFOPE, Fundo de Desenvolvimento do Capital Humano (FDCH), Instituto de Apoio ao Desenvolvimento Empresarial (IADE), no Servisu Munisipál Edukasaun Aileu, ne’ebé reprezenta direta husi Sra. Diretora Edukasaun.
PAM mós enfatiza katak matéria sira ne’ebé oradór sira sei fahe importante tebes ba dezenvolvimentu foinsa’e sira, nune’e nia bolu partisipante hotu atu investe no kapasita an liu husi oportunidade formasaun ne’ebé iha.
“Hau-nia moto ne’ebé sempre dehan iha fatin-fatin, labele husu atu ó kuu iha sa tinan, maibé husu ba ó-nia a’an kuda iha sa tinan. Se ohin o kuda, tinan lima o sei kuu bazeia ba ó-nia kuda. Karik kuda deit la rega no la tau rai-metan, nia nafatin moris maibé la fó fuan. Agora imi mai husi família, no dadaun imi iha Timor, no loron ida imi sei ba mundu. Hahú ona ba investe ho sakrifísiu sira, tanba nasaun presija ita hotu.” PAM konklui.
Entretantu tuir dadus husi Diretór SEFOPE Aileu, Sr. Lourenço Alves Falcão hateten, estudante hirak ne’ebé partisipa iha feira ne’e hamutuk 1062, ne’ebé kompostu husi feto: 553 no mane: 509. Totál estudante hirak ne’e mai husi eskola Ensinu Sekundária sira hanesan: Eskola ESGAM Malere, ESGAM Seloi-kraik, Eskola ESTV, Eskola Katólika São José Operário Remexio no Eskola CAFE.
Atividade ne’e partisipa husi Komandante PNTL Munisípiu Aileu, Diretores Nasionais, Diretores Munisipais no Delegasaun Territoriais, Administrador Postu Administrativu ho Lideransa Komunitária sira, Professores, Estudantes no Funsionáriu sira.
Aileu, 29 Jullu 2026 – Prezidente Autoridade Munisipál (PAM) Aileu, Sr. Jacinto Ribeiro Dias, hala’o enkontru dahuluk ho estrutura Autoridade nian, ne’ebé kompostu husi Sekretáriu Munisipál, Diretores Servisus Munisipais ho Administrador Postu Administrativu sira, kuarta horseik iha salaun I AMA, hodi koñese liután kona-ba kna’ar, funsaun, dezafiu no oportunidade sira ne’ebé durante ne’e enfrenta iha implementasaun servisu públiku.
Enkontru ne’e hala’o ho objetivu atu haforsa koordenasaun institusionál no hadi’a komunikasaun entre lideransa Autoridade Munisipál ho estrutura téknika sira, atu nune’e bele asegura prestasaun servisu públiku ne’ebé efisiente, efetivu no responde ba nesesidade komunidade.
Iha oportunidade ne’e, Sekretáriu Munisipál, Diretór Servisu Munisipál, Administrador Postu Administrativu sira no inklui Gabinete PAM rasik aprezenta sira-nia responsabilidade, programa servisu, rezultadu ne’ebé konsege ona, no mós dezafiu sira ne’ebé seidauk rezolve iha área servisu ida-idak. Sira mós fahe hanoin kona-ba oportunidade sira atu aumenta koordenasaun no hadi’a implementasaun programa governu iha nivel munisipál no postu administrativu.
Iha intervensaun PAM nian haktuir katak servisu públiku tenke fundamenta ba responsabilidade, integridade, transparénsia no servisu hamutuk. Nia mos husu ba estrutura hotu-hotu atu kontinua hametin espiritu kolaborasaun, aumenta disiplinas no halo inovasaun iha servisu atu bele fó atendimentu ne’ebé lalais no ho kualidade ba povu.
Tuir PAM, koñesimentu kle’an kona-ba realidade iha kada unidade servisu importante tebes atu bele define estratéjia no prioridade dezenvolvimentu ne’ebé loos, responde ba nesesidade povu no apoia implementasaun programa Governu nian iha Munisípiu Aileu.
Enkontru dahuluk ida ne’e marka komesu “etapa foun” ida ba lideransa foun hodi harii servisu ne’ebé hamutuk, profesional no orienta ba rezultadu, atu realiza governasaun ne’ebé di’ak no dezenvolvimentu sustentável ba Munisípiu Aileu.
Enkuantu iha enkontru refere, Sekretáriu Munisipál ba Asuntu Administrasaun no Finansas entrega hikas ekipamentu servisu sira ne’ebé durante ne’e utiliza husi PAM sesante ba PAM atuál, Sr. Jacinto Ribeiro Dias. Entrega ekipamentu ne’e simboliza transferénsia responsabilidade no kontinuidade servisu administrativu iha Autoridade Munisipál, atu asegura katak atividade no prestasaun servisu públiku kontinua lao ho di’ak.
Prejensa mós iha enkontru ne’e husi Xefe Departamentu, Ekipa PARTISIPA Aileu no Funsionáriu Tékniku sira.
Aileu, 03 Agostu 2026. Prezidente Autoridade Munisípiu Aileu, Sr. Jacinto Ribeiro Dias, segunda ohin, sai nu’udar inspetór iha Seremónia Hasa’e Bandeira Repúblika Demokrátika Timor-Leste (RDTL) ba semana dahuluk fulan Agostu, ne’ebé realiza iha resintu Autoridade Munisípiu Aileu (AMA). Seremónia ne’e akompaña husi Sekretáriu Munisipál sira, Komandante PNTL Munisípiu Aileu ho nia komitiva, Administrador Postu Administrativu Aileu, Diretor Servisu Munisipál no Delegasaun Territoriál sira.
Iha diskursu husi Inspetór seremónia hateten katak, hafoin simu pose iha loron 28 Jullu 2026, mai ho misaun atu hametin fila-fali unidade, rekonsilia mentalidade povu Aileu nian, nune’e husu atu haluhan diferensa sira ne’ebé akontese ona iha tempu liubá. Tuir Inspetór, esperiénsia no istória liubá tenki sai hanesan aprendizajen no referénsia hodi hakat ba futuru ne’ebé diak liután.
Prezidente Autoridade Munisípiu esplika mós katak durante loron 100 “atus-ida” iha nia mandatu, sei fó prioridade atu komprende kle’an realidade Munisípiu Aileu, hatene komunidade, potensialidade no dezafiu sira ne’ebé iha. Hafoin períodu ne’e remata, sei hahú implementa programa no estratéjia sira atu lori Aileu ba dezenvolvimentu ne’ebé prosperu no sustentável.
PAM mós reafirma katak sei halibur hamutuk lideransa hotu-hotu iha Munisípiu, inklui líder polítiku sira, veteranus, líder komunitáriu no entidade relevante sira, atu kontribui ho hanoin no proposta sira hodi hametin dezenvolvimentu no preparasaun ba desentralizasaun. Tuir PAM, liu husi kooperasaun ne’e, Munisípiu Aileu bele iha direksaun ne’ebé klaru no objetivu ba futuru.
Iha oportunidade ne’e, Inspetór apela ba funsionáriu públiku hotu-hotu atu hala’o servisu ho dixiplinu, responsabilidade no integridade. Nia enfatiza katak funsionáriu Estadu tenki konsiente katak sira-nia servisu mak ba interese povu no nasaun. Tanba ne’e, atendimentu ba komunidade tenki halo ho laran-diak, respeitu no profesionalizmu, tanba povu ne’ebé mai tanba nesesidade mak obriga.
Relasionadu ho orientasaun ba semana dahuluk fulan Agostu, Prezidente Autoridade Munisípiu lansa inisiativa ambiente ho tema “Fó Netik Oras Rua ba Hau-nia Ambiente”, ho subtema “Ema Ida Foti Lixu Ida”. Inisiativa ida ne’e sei hahú iha sexta-feira semana ida-ne’e, ho objetivu atu hamoos edifísiu governamentál no fatin públiku sira iha nivel Munisípiu, Postu Administrativu, Suku no Aldeia.
Prezidente Autoridade Munisípiu kompromete atu hametin pilár tolu ba dezenvolvimentu Munisípiu, mak Igreja, Administrasaun no Seguransa, hanesan baze atu hamoris diálogu, rekonsilia relasaun entre parte hotu-hotu no hametin governasaun ne’ebé diak, responsável no sustentável ba povu Aileu. PAM konklui.
Entertantu ekipa hasa’e Bandeira responsável husi Funsionáriu Autoridade, Komandante Parada husi Komando PNTL Aileu no responsável ba koru husi Servisu Munisipál Terras no Propriedades Aileu.
Hafoin seremónia hasa’e Bandeira remata, Komandante PNTL Munisípiu Aileu hamutuk ho Segundu Komandante PNTL Munisípiu Aileu hala’o audénsia ho Prezidente Autoridade Munisípiu (PAM) Aileu, Sr. Jacinto Ribeiro Dias, hodi ko’alia kona-ba esforsu hamutuk atu hametin kooperasaun entre instituisaun sira.
Iha enkontru ne’e, parte rua ne’e diskute kona-ba implementasaun pilár tolu ne’ebé sai hanesan prioridade iha lideransa PAM, mak Igreja, Administrasaun no Seguransa, hanesan baze importante atu hametin estabilidade, rekonsiliasaun, servisu públiku no dezenvolvimentu sustentável iha Munisípiu Aileu.
Hanoin liuhusi koordenasaun no kolaborasaun ne’ebé metin entre Autoridade Munisípiu no PNTL, bele kontribui ba kria ambiente ne’ebé seguru, governasaun ne’ebé diak no harmonia sosial, hodi suporta prosesu dezenvolvimentu Munisípiu Aileu ba futuru.
Aileu–Remexio, 02 Agostu 2026.
Hafoin remata ona serimónia inaugurasaun Kapela Foun Sagrado Coração de Jesus Faturasa, Prezidente Autoridade Munisípiu Aileu, Sr. Jacinto Ribeiro Dias, akompaña Sua Eminénsia Dom Virgílio Cardeal do Carmo da Silva, SDB, hamutuk ho Sua Eminénsia Cardeal Peter Kodwo Appiah Turkson, iha sira-nia dalan fila hikas ba rezidénsia iha Dili.
Iha dalan, bainhira to’o iha resintu Santuáriu Jesus Divina Mizerikordia Berelisu, Faturasa, Sua Eminénsia Dom Virgílio Cardeal do Carmo da Silva, akompaña husi PAM no sarani Berelisu, hala’o momentu orasaun hamutuk iha santuáriu refere.
Iha orasaun ne’e, husu ba Nai Maromak nia grasa no bensaun atu haforsa sarani Berelisu sira, nune’e bele kontinua moris iha dame, hametin fiar, serví ba Maromak no hatudu domin no solidariedade ba ema seluk.
Enkuantu prezensa Sua Eminénsia Kardeal no PAM iha Santuáriu Jesus Divina Mizerikordia Berelisu simu ho laran ksolok husi komunidade sarani sira, ne’ebé konsidera momentu ne’e nu’udar oportunidade ida atu hametin relasaun fraternidade no moris hamutuk iha espíritu fiar.
Aileu, 29 Jullu 2026 – Prezidente Autoridade Munisipál (PAM) Aileu, Sr. Jacinto Ribeiro Dias, hala’o enkontru dahuluk ho estrutura Autoridade nian, ne’ebé kompostu husi Sekretáriu Munisipál, Diretores Servisus Munisipais ho Administrador Postu Administrativu sira, kuarta horseik iha salaun I AMA, hodi koñese liután kona-ba kna’ar, funsaun, dezafiu no oportunidade sira ne’ebé durante ne’e enfrenta iha implementasaun servisu públiku.
Enkontru ne’e hala’o ho objetivu atu haforsa koordenasaun institusionál no hadi’a komunikasaun entre lideransa Autoridade Munisipál ho estrutura téknika sira, atu nune’e bele asegura prestasaun servisu públiku ne’ebé efisiente, efetivu no responde ba nesesidade komunidade.
Iha oportunidade ne’e, Sekretáriu Munisipál, Diretór Servisu Munisipál, Administrador Postu Administrativu sira no inklui Gabinete PAM rasik aprezenta sira-nia responsabilidade, programa servisu, rezultadu ne’ebé konsege ona, no mós dezafiu sira ne’ebé seidauk rezolve iha área servisu ida-idak. Sira mós fahe hanoin kona-ba oportunidade sira atu aumenta koordenasaun no hadi’a implementasaun programa governu iha nivel munisipál no postu administrativu.
Iha intervensaun PAM nian haktuir katak servisu públiku tenke fundamenta ba responsabilidade, integridade, transparénsia no servisu hamutuk. Nia mos husu ba estrutura hotu-hotu atu kontinua hametin espiritu kolaborasaun, aumenta disiplinas no halo inovasaun iha servisu atu bele fó atendimentu ne’ebé lalais no ho kualidade ba povu.
Tuir PAM, koñesimentu kle’an kona-ba realidade iha kada unidade servisu importante tebes atu bele define estratéjia no prioridade dezenvolvimentu ne’ebé loos, responde ba nesesidade povu no apoia implementasaun programa Governu nian iha Munisípiu Aileu.
Enkontru dahuluk ida ne’e marka komesu “etapa foun” ida ba lideransa foun hodi harii servisu ne’ebé hamutuk, profesional no orienta ba rezultadu, atu realiza governasaun ne’ebé di’ak no dezenvolvimentu sustentável ba Munisípiu Aileu.
Enkuantu iha enkontru refere, Sekretáriu Munisipál ba Asuntu Administrasaun no Finansas entrega hikas ekipamentu servisu sira ne’ebé durante ne’e utiliza husi PAM sesante ba PAM atuál, Sr. Jacinto Ribeiro Dias. Entrega ekipamentu ne’e simboliza transferénsia responsabilidade no kontinuidade servisu administrativu iha Autoridade Munisipál, atu asegura katak atividade no prestasaun servisu públiku kontinua lao ho di’ak.
Prejensa mós iha enkontru ne’e husi Xefe Departamentu, Ekipa PARTISIPA Aileu no Funsionáriu Tékniku sira.
Aileu-Lequidoe, 29 Jullu 2026. PAM-Aileu, Sr. Jacinto Ribeiro Dias, kuarta ohin akompaña husi Sekretáriu Munisipál Asuntu PIDI, Sr. Francisco Aurélio Aleixo Martins, hamutuk ho Diretores Servisus Munisipais, Administrador Postu Lequidoe, Komandante Eskuadra, Lideransa Komunitária no Konviksaun Relijioza sira, tau ona fatuk da-huluk ba rai kuak nu’udar símbolu ba hahú konstrusaun Eskola EBC Aidulalan iha Suku Namolesu, Postu Lequidoe.
Iha intervensaun, PAM-Aileu, Sr. Jacinto Ribeiro Dias hateten, hau mai iha fulan klaran, no hau mai atu hatutan deit. Obra ida ne’e sesante ninia obra ou planu no IX governu nia obra, hau mai atu lao tuir no mai atu buka tuir deit, imi halo ida ne’ebé no ba se mak imi halo. Ita tenki buka tuir ninia fukun loloos ka alvu tanba povu mak autór “sai nain ba obra sira”.
“Ohin hahú serimónia lansamentu primeira pedra ba projetu PDIM iha Postu Lequidoe, objetivu husi lansamentu ne’e ita bolu nu’udar oportunidade ida mak mai, maibé saida mak atu asegura oportunidade ne’e maka ita-nia komitmentu rasik”. Dehan PAM.
Obra ne’e atu ezekuta ho kualidade diak ba povu Lequidoe maka, PAM ezije kompañia sira tenki konsiente aan hanesan Aileu oan., “ita nu’udar Aileu oan tenki halo buat diak, kestaun matak imi nian no tasak ne’e povu Lequidoe nian. Hanoin ida ne’e!, labele hanoin: TU FOI AU FE BESU (naran katak hau mak bosu). Intensaun hirak ne’e halo governu mak sempre sala, maibé governu hateten katak governu la’os mesak, lao hamutuk ho empreza sira. Hanesan ita halo komparasaun ida: ita-nia liman fuan inan ne’e mak governu no liman sanak sira mak ita hotu nia parte. Tan ne’e ita lolo nafatin liman fuan sira ba luvas ida, atu ita bele atinje rezultadu sira., nune’e ita labele prega nafatin todan ne’e ba governu”. PAM konklui.
Entretantu projetu PDIM Tinan 2026 iha Munisípiu Aileu hamutuk 25 ho númeru ne’e, Postu Administrativu Lequidoe iha projetu 5, ne’ebé kobre ba setór Saúde, Edukasaun no Obras Públikas “Be’e no Saneamentu”, hanesan sita iha kraik:
01. Projetu Konstrusaun Postu Saúde Biloko, ne’ebé responsável husi kompañia RAEUDUN BERE Unipessoal, Lda;
02. Projetu Konstrusaun Eskola EBC Betulau, ne’ebé responsável husi kompañia NORTHLANDMASHA Unipessoal, Lda;
03. Projetu Konstrusaun Eskola EBF Aidulalan, ne’ebé responsável husi kompañia LIKANI’26 Unipessoal, Lda;
04. Projetu Konstrusaun Be’e ho Sistema Pump, Instalasaun Liña Transmisaun hodi Destribui ba Komunidade Aldeia Manutai, ne’ebé responsável husi kompañia CONCEIÇÃO MESQUITA Unipessoal, Lda; no
05. Projetu Konstrusaun Rezidénsia Pessoal Saúde Fahisoi, ne’ebé responsável husi kompañia DALOKO JAYA Unipessoal, Lda.
Nú-entantu, projetu hirak ne’e Autoridade lansa simbolikamente ba projetu konstrusaun Eskola EBC Aidulalan iha Suku Namolesu, Postu Lequidoe. No obra refere ezekuta husi LIKANI’26 Unipessoal, Lda: ho montante orsamentu $139,727.15 no durasaun tempu ba tinan ida.
Ita konsiente konstrusaun Eskola EBF Aidulalan hatudu kompromisu Autoridade no governu nian hodi garante asesu ba edukasaun ho kualidade no hamenus disparidade “diferensa” entre área urbana no rural, nune’e bele prepara jerasaun foun ne’ebé matenek hodi kontribui ba dezenvolvimentu rai doben Aileu no Timor-Leste. Ho ida ne’e maka bainhira iha prosesu konstrusaun nia laran, Enjinériu PDIM ne’ebé mak hola parte iha Autoridade hamutuk ho Administrador Postu, Lideransa Komunitária no Komunidade sira nafatin halo kontrolu hamutuk, nune’e buat hotu bele kumpri ba dezeñu no BoQ ne’ebé hetan ona aprovasaun husi governu.
Serimónia ne’e partisipa mós husi ekipa PARTISIPA Aileu, Xefe Gabinete PAM, Funsionáriu tékniku no Komunidade sira.
Aileu, 28 Jullu 2026. S.E. Ministru Administrasaun Estatal, Tomás do Rosário Cabral, akompaña husi Exelentísimu PAM-Aileu, Sr. Jacinto Ribeiro Dias, hamutuk ho S.E. Sekretáriu Estadu Dezenvolvimentu Lokál, S.E SEATOU, DG-DGL no PAM husi Munisípiu sira, tau fatuk da-huluk ba rai kuak nu’udar símbolu ba hahú konstrusaun salaun ba apuramentu munisípiu Aileu nian.
Konstrusaun ne’e hanesan inisiativa ida ne’ebé importante atu reforsa kapasidade Secretariado Técnico da Administração Eleitoral (STAE), liu husi fornese fatin ida ne’ebé apropriadu ba prosesu apuramentu rezultadu eleisaun no atividade administrativu seluk ne’ebé relasiona ho servisu eleisaun nian.
Iha intervensaun, S.E. Ministru Tomás do Rosário Cabral, afirma, Governu kontinua investe iha dezenvolvimentu infraestrutura públika atu garante servisu estadu ne’ebé di’ak liu, transparente no efisiente.
Governante ne’e mós subliña katak, konstrusaun salaun ida ne’e sei fó apoiu bo’ot ba prosesu demokrátiku iha Timor-Leste, liu-liu iha área apuramentu votus no jestaun administrasaun eleitoral.
Projetu ne’e hanesan parte husi esforsu Governu, liu husi Ministériu Administrasaun Estatál, atu hadia fasilidade públiku no hametin sistema administrasaun eleitoral, atu instituisaun relevante sira bele hala’o sira nia kna’ar ho efikásia no responsabilidade.
Ministro MAE hein katak konstrusaun Salaun Apuramentu STAE iha Suku Aissirimou bele remata tuir planu no sai patrimóniu importante ida atu suporta implementasaun eleisaun sira ne’ebé livre, justu, transparente no kredível iha futuru.
Entretantu projetu PDIM Tinan 2026 iha Munisípiu Aileu hamutuk 25 ho projetu sira ne’e, Postu Administrativu Aileu iha hetan projetu 10, hanesan:
01. Projetu Konstrusaun Armajen Ai-han, ne’ebé responsável husi kompañia PATMILAR Unipessoal, Lda;
02. Projetu Konstrusaun Postu Saúde Liurai, ne’ebé responsável husi kompañia ARNES Unipessoal, Lda;
03. Projetu Konstrusaun Salaun Apuramentu STAE Aileu, ne’ebé responsável husi kompañia BERAIJIJU Unipessoal, Lda;
04. Projetu Konstrusaun Be’e-Moos ba suku Fatubosa, ne’ebé responsável husi kompañia QIVAN Unipessoal, Lda;
05. Projetu Kontrusaun Armajen Aimoruk iha AMA inklui Moru Protesaun, ne’ebé responsável husi kompañia DIBORNA Unipessoal, Lda;
06. Projetu Konstrusaun Postu Saúde Saboria, ne’ebé responsável husi kompañia LEOHADIFA’87 Unipessoal, Lda;
07. Projetu Konstrusaun EBF Kotbauru, ne’ebé responsável husi kompañia HAUTKASTADA Unipessoal, Lda;
08. Projetu Konstrusaun Be’e-Moos ba Suku Seloi-Malere, ne’ebé responsável husi kompañia TOTHYMADAFAC Unipessoal, Lda;
09. Projetu Konstrusaun Postu Saúde Hoholau, ne’ebé responsável husi kompañia MUKIT Unipessoal, Lda;
10. Projetu Konstrusaun Aumenta Aula ba Eskola EBF Fatumane, Seloi-kraik, ne’ebé responsável husi kompañia MA’HOR Unipessoal, Lda;
Nú-entantu, projetu hirak ne’e governu lansa simbolikamente ba konstrusaun Salaun Apuramentu STAE ne’ebé lokaliza iha Suku Aissirimou no Postu Administrativu Aileu. No obra refere ezekuta husi BERAIJIJU Unipessoal, Lda: ho montante orsamentu $108,324.18 no durasaun tempu ba tinan ida.
Serimónia ne’e partisipa mós husi Sekretáriu Munisipál, Diretores Servisus Munisipais no Delegasaun Territoriais, Lideransa Komunitária, Funsionáriu no Diretór/a Kompañia sira.
#mediagatpama2026
#Medi@Mae_2026
AILEU, 28 Jullu 2026. S.E. Ministru Administrasaun Estatál (MAE), 𝐓𝐨𝐦á𝐬 𝐝𝐨 𝐑𝐨𝐬á𝐫𝐢𝐨 𝐂𝐚𝐛𝐫𝐚𝐥, hamutuk ho membru Governu MAE, tersa ohin fó pose ba Exelentísimu Sr. 𝐉𝐚𝐜𝐢𝐧𝐭𝐨 𝐑𝐢𝐛𝐞𝐢𝐫𝐨 𝐃𝐢𝐚𝐬, nu’udar Prezidente Autoridade Munisipál (PAM) Aileu iha Sabraka Laran, Aileu.
Iha Nia diskursu, S.E. Ministru MAE afirma ba PAM foun atu hala’o nia kna’ar nu’udar Governu Lokál ne’ebé reprezenta Governu Sentral, ba tranzisaun no preparativus implementasaun Poder Lokál iha Aileu, tuir programa IX Governu Konstitusionál nian ba polítika desentralizasaun poder lokál.
S.E. Ministru MAE apela mós ba funsionáriu Servisu Munisipál Aileu atu servisu ho di’ak no responsabilidade nu’udar funsionáriu administrasaun públiku atu servisu hamutuk ho parseiru sira hanesan PNTL, F-FDTL, Veteranu, ONG no entidade sira seluk iha Munisípiu Aileu hodi asegura pás no estabilidade, nune’e bele lori dezenvolvimentu ba povu iha Aileu.
Iha okaziaun hanesan, Exelentísimu PAM-Aileu emposadu, Sr. Jacinto Ribeiro Dias husu mós ba funsionáriu sira iha Aileu atu servisu hamutuk ho entidade sira hotu hodi lori Aileu ba oin. PAM mós kompromete atu lori dezenvolvimentu to’o iha suku no aldeia, liuliu ba asesu bee, eletrisidade no estrada rurál sira ne’ebé durante ne’e povu Aileu enfrenta hela.
PAM Jacinto Ribeiro Dias hato’o mós agradesimentu ba IX Governu Konstitusionál ne’ebé lidera husi S.E. Primeiru-Ministru, 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦ã𝐨 ne’ebé fó konfiansa ba nia atu assume kna’ar ne’e. Nu-entantu Nia rekoñese mós servisu sira ne’ebé PAM sesante halo ona durante nia mandatu, no afirma katak nu’udar PAM foun sei kontinua servisu sira ne’ebé seidauk finaliza.
PAM foun Aileu afirma tan katak sei servisu hamutuk ho kamada intelektuál sira nu’udar poténsia Munisípiu Aileu nian atu lori rekonsiliasaun to’o ba povu iha suku sira.
“Ha’u apela ba Aileu-oan sira atu fila ba ita-nia uma Aileu. Mai hamutuk ita haluha pasadu no lori dezenvolvimentu ba povu Aileu,” afirma PAM Jacinto Ribeiro Dias.
Serimónia ne’e partisipa máximu husi Membru Governu Da-IX “PAM Munisípiu no Raeoa”, Dirijentes Autoridades Municipais Aileu, Komando PNTL Munisípiu Aileu, Administrador Postu hamutuk ho Lideransa Komunitária sira, Funsionáriu, Konviksaun Relijioza, Líder Partidu Polítiku sira, Organizasaun Feto Aileu, Organizasaun Intelektual Aileu-Anan, Família, Komunidade no Povu Aileu-Anan sira.
#mediagatpama2026
#Medi@Mae_2026
Dili, 23 Juñu 2026. Exelénsia Prezidente Autoridade Munisípiu Aileu “João Bosco dos Santos” hamutuk ho Diretór Servisu Munisipál Agrikultura, Reprezentante Administrador Postu Administrativu Aileu no parte Ministériu Agrikultura Pekuária, Peskas no Florestas ne’ebé reprezenta husi DNEFA “Sr. Januario Marçal”, tersa horseik partisipa iha workshop validasaun ne’ebé organiza husi Organizasaun Ai-han no Agrikultura Nasoins Unidas (FAO), iha City8 Manleuana (Leadership room).
Iha fulan Fevereiru ne’e, Ministériu Agrikultura, Pekuária, Peskas no Floresta (MAPPF) liu husi Diresaun Jeral Agrikultura, Kafe no Plantas Industriais, iha kolaborasaun ho Organizasaun Ai-han no Agrikultura Nasoins Unidas (FAO), halo ona sorumutu nasionál ida hodi halo konsultasaun inisial kona-bá projetu restorasaun rai degradadu sira liuhusi sistema agroalimentar ne’ebé biodiversidade-amigável, ho alvu prinsipal mak Lagóa Seloi, Aileu.
Projetu ne’e buka atu hakbiit komunidade lokál sira atu implementa no habelar sistema agríkola sira ne’ebé amigável ba biodiversidade iha Lagóa Seloi no área sira ne’ebé besik ba Lagóa ne’e, atu hadi’a kondisaun moris no hadi’a biodiversidade.
Enkuantu ekipa ne’ebé serbisu ba formulasaun projetu ne’e nian, hala’o ona konsultasaun mós ho Autoridade no komunidade sira iha Suku Seloi-kraik, hodi rona sira-nia hanoin no konfirma sira nia interese oinsa projetu ida ne’e bele responde diak liutan ba komunidade agrikultór sira-nia prioridades. Konsultasaun hanesan hala’o ona mós ho liñas ministeriais iha nível nasionál hodi aserta aliñamentu ho prioridade nasionál no asegura koordenasaun servisus ne’ebé iha objetivus komplementáriu.
Tan ne’e, haktuir ba kalendarizasaun husi FAO nian, iha loron 23 fulan Juñu ne’e sei hala’o workshop validasaun ida hodi akumula parte Autoridade Munisípiu no Ministériu Agrikultura no entidade relevante seluk, atu partisipa no kontribui ideia brillante sira ba projetu ne’ebé sei implementa iha tinan 2027 ho ninia benefísiu direita ba komunidade Seloi.
Exelénsia PAM-Aileu agradese tebes ba FAO tanba hili ona Lagóa Seloi hodi implementa projetu restorasaun rai degradadu sira liuhusi sistema agroalimentar ne’ebé biodiversidade no amigável, maibé nia parte mak nafatin ezije ba ekipa atu hala’o koordenasaun no komunikasaun ne’ebé efetivu entre instituisaun sira, hodi ajuda atu garante implementasaun projetu lao tuir planu, responde ba nesesidade komunidade sira, no atinje objetivu projetu nian ho efisiente.
Entretantu projetu ida-ne’e sei kontribui signifikativamente ba dezenvolvimentu sustentável iha Seloi, liuhusi restaurasaun rai degradadu sira no promosaun sistema agroalimentar ne’ebé harmoniza produzaun ai-han ho konservasaun ambientál.
Ho apoiu husi governu, parseiru dezenvolvimentu no komunidade lokal, projetu ida-ne’e bele sai modelu ida ba restaurasaun ambientál no seguransa ai-han iha Timor-Leste tomak no espesiál iha Munisípiu Aileu (Lagóa Seloi).
Tuir planeamentu FAO nian katak, projetu ne’e sei hala’o durante tinan 3 (komesa iha fulan Abril 2027 no sei remata iha fulan Agostu 2030).
Workshop ne’e partisipa mós husi grupu komunidade sira husi Seloi.
© 2026 Administration Municipality of Aileu
