Aileu, 22 Janeiru 2026. Ministériu Agrikultura, Pekuária, Peskas no Florestas- MAPPF, kinta ohin lansa ekipamentu agríkola ba faze daruak nian hodi suporta dezenvolvimentu setór agrikultura no hasa’e produtividade agrikultór sira iha Aileu.
Ekipamentu mecanizasaun ne’e entrega husi Exelénsia Ministru Agrikultura, Pekuária, Peskas no Florestas, 𝐄𝐧𝐠. 𝐌𝐚𝐫𝐜𝐨𝐬 𝐝𝐚 𝐂𝐫𝐮𝐳, 𝐌𝐀𝐠.𝐒𝐭 ba Exelénsia Prezidente Autoridade Munisípiu Aileu “𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” no direita ba Diretór Servisu Munisipál Agrikultura Aileu “𝐒𝐫. 𝐏𝐞𝐝𝐫𝐨 𝐝𝐨𝐬 𝐒𝐚𝐧𝐭𝐨𝐬 𝐝𝐚 𝐒𝐢𝐥𝐯𝐚”, kinta ohin iha resintu salaun Timor-Klaran Aileu. Iha seremónia ne’e hetan mós bensaun ba ekipamentu sira husi Padre Vigáriu Parókia São Pedro no São Paulo Aileu “𝐑𝐞𝐯. 𝐂𝐚𝐫𝐥𝐢𝐭𝐨 𝐓𝐞𝐭𝐢-𝐋𝐚𝐜𝐚”, atu operadores makina bele utiliza ekipamentu sira ho seguru hodi serví komunidade Aileu ho domin no responsabilidade tomak.
PAM apresia ho programa IX governu ne’ebé liu husi polítika Ministériu Agrikultura Pekuária, Peska no Floresta – MAPPF, tanba sempre fo asisténsia téknika hodi halo mudansa ba agrikultores Aileu liu husi ekipamentu modernu sira.
“Ekipamentu sira ne’e importante tebes oinsá maka bele muda ita-nia agrikultores husi sistema tradisionál ba sistema modernu nian”. Dehan PAM.
Iha tinan 2025 Munisípiu Aileu sempre hetan ekipamentu sira husi Ministériu, maske la barak maibé bele iha ona mudansa ba agrikultor sira, ho ida ne’e PAM relata relatóriu sira reflete ba progresu servisu ne’ebé SM Agrikultura liu husi Extensionista Suku hamutuk 38 rekolla iha baze. “Tinan 2024 natar iha Aileu ne’e ita hetan hektares 398, ho númeru ne’e ita abandona hela hektares 109. Maibé depoiz de tinan 2025 ita-nia Extensionista Suku sira ne’ebé Autoridade koloka ba Suku 35 iha Aileu konsege identifika natar hamutuk 477 mak komunidade utiliza hotu ona, enkuantu mudansa sira tanba prejensa ekipamentu modernu ne’ebé apoiu husi MAPPF”. PAM akresenta.
Extensionista ba Suku 35 iha Aileu Autoridade kompleta ona, nune’e líder máximu ne’e husu ba Ministériu atu kontinua fo asisténsia téknika liu husi formasaun profesionál ba sira, inklui kompleta mós transporte hodi sira bele mellora diak liu tan servisu agrikultura nian iha Aileu. PAM konklui.
Sorin seluk Exelénsia Ministru Agrikultura, Pekuária, Peskas no Florestas, 𝐄𝐧𝐠. 𝐌𝐚𝐫𝐜𝐨𝐬 𝐝𝐚 𝐂𝐫𝐮𝐳, 𝐌𝐀𝐠.𝐒𝐭 hateten, makina hirak ne’e nain mak Munisípiu, maibé Autoridade presija servisu hamutuk ho Administrador Postu no Xefe Suku sira hodi introduz sistema mecanizasaun no modernizasaun setór agrikultura ba komunidade sira, atu nune’e bele fasilita agrikultores sira ba hasa’e produsaun.
Governante ne’e mós esklarese, Ministériu laos apoiu traktor deit, maibé durante ne’e apoiu mós adubu orgâniku, fini hare, fini batar, fini modo no ai-oan “ne’ebé fo fuan”. Dehan MAPPF bainhira hato’o polítika Ministériu nian ba entidade relevante no partisipante sira, kinta ohin iha resintu Salaun Timor-Klaran Aileu.
Entertantu ekipamentu mecanizasaun sira ba loron ohin MAPPF entrega ba Autoridade Aileu mak hanesan:
01. Traktor Kubota Mediu L 5018 unidade 1 ho nia implement hanesan:
-Rotary unidade 1
-Carua unidade 1;
02. Makina Kuda Hare unidade 6;
03. Rak/ Bandeja ba viverus fatin 1.800 pcs ((kada unit 1.300 pcs);
04. Makina Ko’a Hare iha unidade 4 (maibé unidade 2 mak momentu ne’ebá lansamentu hamutuk ho atividade Ekonómia Azúl iha Suku Seloi-kraik, Postu Aileu-Villa); no
05. Atralado unidade 1.
Laos ekipamentu hirak ne’e deit, Ministru mós kompremetidu hela, iha tempu tuir mai sei apoiu tan Hand Tractor ho unidade 10 mai Autoridade Aileu.
NB: Ekipamentu sira ne’e agora dadaun konsentra hela iha armajen SM Agrikultura Aileu, apela ba komunidade sira bainhira presija ekipamentu bele hato’o karta pedidu liu husi Extensionista Suku no Konsellu Suku sira mai SM Agrikultura, nune’e operadores makina sira bele fo asisténsia tuir nesesidade ne’ebé presija. Autoridade halo jestaun ida ne’e, tanba hakarak asegura ekipamentu sira bele uja ba tempu naruk hodi kontinua hasa’e produsaun iha Munisípiu Aileu.
Seremónia ne’e partisipa mós husi Diretór Nasionál, Sekretáriu Munisipál Asuntu Sosiál no Organizasaun, Rep. Komandante PNTL Aileu, Komandante Eskuadra Aileu-Villa, Diretores Servisus Munisipais, Delegasaun Territoriais, Rep. Administrador Postu, Rep. Veteranus, Autoridade Komunitária no Funsionáriu sira.
Aileu, 05 Janeiru 2026. PAM-Aileu “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬”, segunda ohin iha resintu AMA, sai hanesan inspetór ba seremónia hasa’e Bandeira RDTL ba semana dahuluk fulan Janeiru nian, ne’ebé akompaña husi Sekretáriu/a Munisipál, Komandante PNTL Munisípiu Aileu ho Komitiva , Administrador husi Postu, Diretor Servisu Munisipál no Delegasaun Territoriál sira hotu.
Rezultadu avaliasaun kondisaun mínima husi Ministériu mai iha Munisípiu ho ninia rezultadu sira, Aileu tama iha kategoria Bom ho valór 77.08%, maibé etapa ikus liu S. E. Primeiru Ministru RDTL sei tun mai hodi haree direitamente situasaun no kondisaun sira , hafoin lori ba deside hamutuk iha Konsellu Ministru, nune’e bele identifika Munisípiu ne’ebé mak sei hakat ba Podér Lokál, ne’ebé tuir kalendáriu sei anúnsia iha loron 20 fulan Maiu 2026. Dehan Inspetór Seremónia.
“Iha parte rekursus umanus nian, tinan ida ne’e ita kompleta ona Xefe Departamentu hamutuk 19 no Xefe Seksaun ba Postu sira hamutuk 7, ne’e katak estrutura Autoridade kompletu ona. Husu ba Diresaun sira prepara aan bainhira ekipa husi nasional lori rezultadu avaliasaun hodi fó sai ita-nia failla sira, tenki hadia emediata”. Inspetór ne’e hatutan.
Ikus liu Inspetór ba seremónia ne’e husu ba funsionáriu sira atu mellora diak liu tan servisu sira liu husi K³ “Koordenasaun, Kooperasaun no Komunikasaun”, haktuir ba dever jerál hirak ne’ebé hatuur ona iha estatutu Funsaun Públika, lei nú. 8/2004 loron 5 fulan Maiu.
Entertantu ekipa hasa’e Bandeira responsável husi DNSPP, Komandante Parada husi Komando PNTL Aileu no responsável ba koru husi Servisu Munisipál Edukasaun Aileu.
=========
Hafoin hasa’e Bandeira, PAM simbolikamente entrega mós motorizada unidade 4 ho marka Verza ba Administrador Postu Administrativu 4 iha Munisípiu Aileu.
Lian benvindu husi PAM-Aileu “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” hato’o agradese no hakuak boot ba entidade relevante no funsionáriu sira hotu iha Timor laran ho saúde diak bele mai hamutuk iha fatin salaun Timor-Klaran ida ne’e.
“Aileu totál funsionáriu 51 mak hakat ba reforma maibé iha númeru ne’e maioria professores ho totál 38. Agradese tebes ba ita-boot sira-nia nia kontribuisaun tomak durante partisipa hodi hala’o kna’ar no responsabilidade sira hanesan funsionáriu ba kontribui ona ba rai ida ne’e”. Lian agradesimentu PAM nian ba funsionárius reformadus Aileu no totál funsionárius 1,985 ne’ebé sei hakat ba reforma iha tinan oin.
Exelénsia Prezidente KFP, 𝐀𝐠𝐨𝐬𝐭𝐢𝐧𝐡𝐨 𝐋𝐞𝐭ê𝐧𝐜𝐢𝐨 𝐝𝐞 𝐃𝐞𝐮𝐬, hateten katak serimónia ida-ne’e importante ne’ebé primeira vez realiza iha konstrusaun Estadu no iha prosesu dezenvolvimentu administrasaun públika Timor-Leste. Serimónia ne’e fó ita-nia rekoñesimentu profunda no dignu ba funsionáriu hamutuk 1.985. Entre sira-ne’e, maioria husi profesór sira ne’ebé serví ba Estadu Timor-Leste ho sira-nia dedikasaun tomak, espíritu, no servisu durante tinan barak. Rekoñesimentu ne’e fó liu husi Primeiru-Ministru ninia asinatura iha sertifikadu, ne’ebé reprezenta rekoñesimentu Estadu tomak nian.
Reprezentante MSSI hato’o kompromisu Ministra MSSI nian katak, iha kontestu administrasaun públika, ida-ne’e nesesáriu duni hodi fó impaktu ba progresu no dezempeñu husi kada instituisaun ne’ebé serví ba nasaun ida-ne’e. MSSI agradese no louva KFP ninia esforsu ne’ebé halo hodi hadi’a no eleva kualidade sistema jestaun administrasaun públika liu husi reforma sira.
Iha intervensaun, Exelénsia Ministra Edukasaun, 𝐃𝐮𝐥𝐜𝐞 𝐝𝐞 𝐉𝐞𝐬𝐮𝐬, hateten katak funsionáriu públiku ne’ebé tama ona ba reforma obrigatória, sira sakrifika aan barak, liuliu profesór sira ne’ebé hamriik (hanorin) durante tempu Portugés, tempu okupasaun, to’o Timor ukun rasik aan. Ita-boot sira kontribui ba dezenvolvimentu ita-nia Estadu ida-ne’e. Ministra mós kongratula espesiál ba manorin-na’in sira ne’ebé sai nu’udar erói ba nasaun ida-ne’e, hamutuk ema 1.305. Husi ita-boot sira-nia kolen, agora tama ba faze foun moris nian, ne’ebé integra hikas ba família hodi hahú aventura foun lahó servisu. Serimónia ne’e atu fó onra boot ba ita-nia erói sira ne’ebé durante ne’e fó aan ba administrasaun públika Timor-Leste. Sira simu sertifikadu ne’e hanesan memória no evidénsia ba Estadu ida-ne’e. Maske tinan oin kadeira iha eskola no eskritóriu sira sei mamuk, imi-nia prezensa sei la lakon, imi-nia lian sei hananu nafatin iha estudante sira-nia hanoin, no imi-nia matadalan sei sai naroman ba futuru. Imi-nia lalatak sei sai motivasaun ne’ebé kuda hela iha estudante sira-nia memória no sei rona nafatin iha sira-nia moris tomak. Nu’udar profesór di’ak ida, nunka reforma iha estudante sira-nia fuan, maibé sai susesu ba estudante sira iha futuru ne’ebé di’ak.
Iha tempu hanesan, Exelénsia Prezidente Komisaun A Parlamentu Nasionál, 𝐏𝐚𝐭𝐫𝐨𝐜í𝐧𝐢𝐨 𝐅𝐞𝐫𝐧𝐚𝐧𝐝𝐞𝐬 𝐝𝐨𝐬 𝐑𝐞𝐢𝐬, fó omenajen ba funsionáriu reformadu sira iha konstrusaun Estadu Timor-Leste ne’ebé uluk luta hodi harii administrasaun públika. No saúda esforsu no dedikasaun funsionáriu sira nian. Administrasaun públika eziste tanba ita-boot sira-nia esforsu no kontribuisaun ba Estadu. Tempu marka ona servisu ne’ebé hala’o, maibé agora importante mak atu hato’o fali ba jerasaun foun sira hodi iha espíritu servisu ho dedikasaun no garante persisténsia. Lori Komisaun A nia naran, nia hato’o apresiasaun boot no parabeniza servisu KFP ho ninia funsionáriu sira ne’ebé serví ho di’ak ba makina Estadu nian.
Entretantu, reprezentante S.E. Primeiru-Ministru, Vise-Ministru Asuntu Parlamentár, 𝐀𝐝é𝐫𝐢𝐭𝐨 𝐇𝐮𝐠𝐨 𝐝𝐚 𝐂𝐨𝐬𝐭𝐚, dehan katak eventu istóriku ida-ne’e partisipa husi funsionáriu sénior sira, hanesan kontinuasaun ba reforma funsionalizmu públiku. Polítika nasionál IX Governu Konstitusionál dezenha ho di’ak tebes ba dinámika prosesu administrasaun públika Timor-Leste nian. Susesu Timor-Leste iha pós-independénsia sura mós ho kontribuisaun husi ita-boot sira.
Iha diskursu, Exelénsia Vise-Ministru 𝐀𝐝é𝐫𝐢𝐭𝐨 𝐇𝐮𝐠𝐨 𝐝𝐚 𝐂𝐨𝐬𝐭𝐚 hateten katak IX Governu foti pasu ida-ne’e nu’udar parte husi orientasaun Primeiru-Ministru nian ba Komisaun Funsaun Públika (KFP), ho objetivu prinsipál mak atu hadi’a mobilizasaun no garante katak administrasaun públika la’o sees husi influénsia polítika partidária. Tema despolitizasaun administrasaun públika ne’e todan, ne’e hanesan ‘trabalho de casa’ boot ida ba ita hotu. IX Governu kompromete ona katak administrasaun públika la’ós fatin ba politizasaun.
Vise-Ministru hatutan katak, antes halo reforma ba funsionáriu sira, Governu prepara ona jerasaun foun Timor-oan sira hodi foti fali knaar nu’udar servidór Estadu nian, nune’e la’ós de’it atu hametin, maibé mós halo renovasaun ba kualidade servisu. Iha parte seluk, Governu garante katak maske sira reforma ona, sira sei kontinua simu pagamentu husi Seguransa Sosiál. Governu sei nafatin hadi’a sistema ne’e hodi asegura katak kontribuisaun ne’ebé sira fó ona durante tinan barak sei fó fali benefísiu ne’ebé dignu.
Serimónia ne’ebé hala’o iha Salaun Timor Klaran, Aileu, kinta-feira (18/12/2025), ne’e partisipa mós husi Prezidente Autoridade munisípiu 12 inklui RAEOA, Diretores Nasionais, Munisipais no Administrador Postu sira.
𝐏𝐀𝐌 𝐈𝐧𝐚𝐠𝐮𝐫𝐚 𝐏𝐫𝐨𝐣𝐞𝐭𝐮 𝐏𝐍𝐃𝐒 𝟐𝟎𝟐𝟓 𝐢𝐡𝐚 𝐁𝐞𝐥𝐮𝐦𝐡𝐚𝐭𝐮, 𝐒𝐮𝐤𝐮 𝐌𝐚𝐝𝐚𝐛𝐞𝐧𝐨.
Laulara-Belumhatu, 16 Dezembru 2025. Prezidente Autoridade Munisípiu Aileu “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬”, ne’ebé akompaña husi Komandante PNTL Munisípiu Aileu “𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐒𝐞𝐛𝐚𝐬𝐭𝐢ã𝐨 𝐀𝐥𝐯𝐞𝐬 𝐐𝐮𝐢𝐧𝐭ã𝐨” hamutuk ho Diretór SM-PNDS “𝐒𝐫. 𝐙𝐚𝐢𝐝𝐨 𝐝𝐚 𝐂𝐨𝐬𝐭𝐚 𝐏𝐞𝐫𝐞𝐢𝐫𝐚” no Administrador Postu Administrativu Laulara “𝐒𝐫. 𝐄𝐠𝐢𝐝𝐢𝐨 𝐅𝐫𝐚𝐧𝐜𝐢𝐬𝐜𝐨 𝐆. 𝐀𝐥𝐞𝐢𝐱𝐨”, tersa horseik inagura ona projetu reabilitasaun sede Aldeia “Sede Multifunsaun” Belumhatu, Suku Madabeno, Postu Administrativu Laulara.
Iha seremónia ne’e Autoridade Komunitária Madabeno “𝐒𝐫. 𝐀𝐟𝐨𝐧𝐬𝐨 𝐌𝐚𝐫𝐪𝐮𝐞𝐬” hateten, durante ne’e komunidade barak mak lao ho distánsia dook ba hala’o tratamentu iha Postu Saúde Sentru Madabeno. Tan ne’e suku identifika projetu mais prioridade ne’e hodi fasilita komunidade sira. Maske edifísiu ne’e hanaran Sede Aldeia, maibé funsionamentu mós ba hala’o tratamentu saúde nian. Iha parte ne’e Xefe Suku ne’e agradese tebes ba Autoridade Aileu ho Servisu Munisipál PNDS nia esforsu no akompañamentu sira.
Tempu hanesan Diretór SM-PNDS “𝐒𝐫. 𝐙𝐚𝐢𝐝𝐨 𝐝𝐚 𝐂𝐨𝐬𝐭𝐚 𝐏𝐞𝐫𝐞𝐢𝐫𝐚” reforsa, ita koalia kona-ba PNDS katak refere ba prioridade mais prioridade ne’ebé komunidade no Autoridade Komunitária sira identifika no deside hamutuk ona, hafoin propoin ba governu aloka osan hodi implementa iha baze.
“Durante ne’e ekipa PNDS hala’o servisu sira haktuir deit ba sistema transparánsia no responsabilidade. Nune’e iha prosesu sira hatudu husi inísiu planeamentu to’o inagurasaun, komunikasaun sira la’o diak tebes. Ida ne’e koresponde kedas ba moto PNDS nian katak, Hamutuk Ita Dezenvolve Nasaun no espesialmente Munisípiu Aileu”. Diretór 𝐙𝐚𝐢𝐝𝐨 esklarese.
Bainhira intervista PAM “𝐄𝐱𝐞𝐥é𝐧𝐬𝐢𝐚 𝐉𝐨ã𝐨 𝐁𝐨𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬” hateten, ohin ita mai halo inagurasaun ba sede aldeia Belumhatu, suku Madabeno ne’e tanba projetu ne’e tama iha programa PNDS tinan 2025 nian. Ita haree projetu ne’e la bo’ot maibé nia funsaun ne’e ema dehan multifunsaun. Dehan PAM.
“Agradese tebes ba Diretór PNDS hamutuk ho tékniku no kompañia sira tanba bele esforsu hodi finaliza projetu ne’e ho durasaun tempu la too fulan 3, atinjimentu 100% ho kualidade diak, inklui halo jestaun interna hodi kompleta mós mobiliáriu sira hanesan: Meza Eskritóriu, Armáriu, Kadeira Babain, Kadeira Roda, Sofá no Hena sira. PAM valoriza servisu Lideransa Komunitária no PNDS nian.
Haktuir ba relatóriu ne’ebé relata husi komisaun organizadora, líder máximu ne’e senti orgullu ho komunidade Belumhatu sira-nia partisipasaun, transparánsia no unidade, durante iha preparasaun sira. PAM konklui.
Preparasaun povu Aileu nian ba simu Kosok-Oan Jesus Kristu no tinan foun 2026 nian, “𝐒𝐮𝐩𝐞𝐫𝐢𝐧𝐭𝐞𝐧𝐝𝐞𝐧𝐭𝐞 𝐒𝐞𝐛𝐚𝐬𝐭𝐢ã𝐨 𝐀𝐥𝐯𝐞𝐬 𝐐𝐮𝐢𝐧𝐭ã𝐨” aproveita oportunidade fó hanoin mós ba komunidade no juventude Belumhatu atu mantein paz no hakmatek, katak lalikan halo barullu nune’e liafuan amigu labele sai fali ba inimigu.
Entertantu naran ba projetu ne’e maka Reabilitasaun Sede Aldeia Belumhatu, distánsia husi Munisípiu ba Sede mais ou menus 8.0 KM, totál orsamentu ba projetu ne’e hamutuk $27,310.00 ne’ebé kobre ba orsamentu ba infraestrutura $24,076.00 no orsamentu operasionál $3,234.00. Enkuantu obra ne’e rasik implementa direita husi Ekipa Implementasaun Programa- EIP ho Komunidade no kompañia Manán-nain ba Fornesedor sira maka: kompañia Fijja fornese materiál fabrikadu no kompañia Anosel fornese materiál lokál sira.
Seremónia ne’e prejensa husi Komandante Eskuadra Laulara, reprezentante Veteranus, Koordenadór Postu, Funsionáriu PNDS Munisípiu, Estrutura Konsellu Suku, Estudante Estajiadu Ensinu Sekundária husi STM no partisipa máximu mós husi komunidade sira.
© 2026 Administration Municipality of Aileu
