Aileu, 03 Agostu 2026. Prezidente Autoridade Munisípiu Aileu, Sr. Jacinto Ribeiro Dias, segunda ohin, sai nu’udar inspetór iha Seremónia Hasa’e Bandeira Repúblika Demokrátika Timor-Leste (RDTL) ba semana dahuluk fulan Agostu, ne’ebé realiza iha resintu Autoridade Munisípiu Aileu (AMA). Seremónia ne’e akompaña husi Sekretáriu Munisipál sira, Komandante PNTL Munisípiu Aileu ho nia komitiva, Administrador Postu Administrativu Aileu, Diretor Servisu Munisipál no Delegasaun Territoriál sira.
Iha diskursu husi Inspetór seremónia hateten katak, hafoin simu pose iha loron 28 Jullu 2026, mai ho misaun atu hametin fila-fali unidade, rekonsilia mentalidade povu Aileu nian, nune’e husu atu haluhan diferensa sira ne’ebé akontese ona iha tempu liubá. Tuir Inspetór, esperiénsia no istória liubá tenki sai hanesan aprendizajen no referénsia hodi hakat ba futuru ne’ebé diak liután.
Prezidente Autoridade Munisípiu esplika mós katak durante loron 100 “atus-ida” iha nia mandatu, sei fó prioridade atu komprende kle’an realidade Munisípiu Aileu, hatene komunidade, potensialidade no dezafiu sira ne’ebé iha. Hafoin períodu ne’e remata, sei hahú implementa programa no estratéjia sira atu lori Aileu ba dezenvolvimentu ne’ebé prosperu no sustentável.
PAM mós reafirma katak sei halibur hamutuk lideransa hotu-hotu iha Munisípiu, inklui líder polítiku sira, veteranus, líder komunitáriu no entidade relevante sira, atu kontribui ho hanoin no proposta sira hodi hametin dezenvolvimentu no preparasaun ba desentralizasaun. Tuir PAM, liu husi kooperasaun ne’e, Munisípiu Aileu bele iha direksaun ne’ebé klaru no objetivu ba futuru.
Iha oportunidade ne’e, Inspetór apela ba funsionáriu públiku hotu-hotu atu hala’o servisu ho dixiplinu, responsabilidade no integridade. Nia enfatiza katak funsionáriu Estadu tenki konsiente katak sira-nia servisu mak ba interese povu no nasaun. Tanba ne’e, atendimentu ba komunidade tenki halo ho laran-diak, respeitu no profesionalizmu, tanba povu ne’ebé mai tanba nesesidade mak obriga.
Relasionadu ho orientasaun ba semana dahuluk fulan Agostu, Prezidente Autoridade Munisípiu lansa inisiativa ambiente ho tema “Fó Netik Oras Rua ba Hau-nia Ambiente”, ho subtema “Ema Ida Foti Lixu Ida”. Inisiativa ida ne’e sei hahú iha sexta-feira semana ida-ne’e, ho objetivu atu hamoos edifísiu governamentál no fatin públiku sira iha nivel Munisípiu, Postu Administrativu, Suku no Aldeia.
Prezidente Autoridade Munisípiu kompromete atu hametin pilár tolu ba dezenvolvimentu Munisípiu, mak Igreja, Administrasaun no Seguransa, hanesan baze atu hamoris diálogu, rekonsilia relasaun entre parte hotu-hotu no hametin governasaun ne’ebé diak, responsável no sustentável ba povu Aileu. PAM konklui.
Entertantu ekipa hasa’e Bandeira responsável husi Funsionáriu Autoridade, Komandante Parada husi Komando PNTL Aileu no responsável ba koru husi Servisu Munisipál Terras no Propriedades Aileu.
Hafoin seremónia hasa’e Bandeira remata, Komandante PNTL Munisípiu Aileu hamutuk ho Segundu Komandante PNTL Munisípiu Aileu hala’o audénsia ho Prezidente Autoridade Munisípiu (PAM) Aileu, Sr. Jacinto Ribeiro Dias, hodi ko’alia kona-ba esforsu hamutuk atu hametin kooperasaun entre instituisaun sira.
Iha enkontru ne’e, parte rua ne’e diskute kona-ba implementasaun pilár tolu ne’ebé sai hanesan prioridade iha lideransa PAM, mak Igreja, Administrasaun no Seguransa, hanesan baze importante atu hametin estabilidade, rekonsiliasaun, servisu públiku no dezenvolvimentu sustentável iha Munisípiu Aileu.
Hanoin liuhusi koordenasaun no kolaborasaun ne’ebé metin entre Autoridade Munisípiu no PNTL, bele kontribui ba kria ambiente ne’ebé seguru, governasaun ne’ebé diak no harmonia sosial, hodi suporta prosesu dezenvolvimentu Munisípiu Aileu ba futuru.
